भांगरभूंय | प्रतिनिधी
-सुभाष फळदेसायः 50 कोटी खर्च अपेक्षीत
पणजी : पुरातत्व खात्यांतल्या सुमार साडेतीन कोटी कागदपत्रांच्या डिजिटलायझेशन संदर्भांत निविदा जारी जाल्यात. ते खातीर 50 कोटींचो खर्च अपेक्षीत आसा. पूण संबंदींत फायल फाटल्या तीन म्हयन्यां पसून वित्त खात्या कडेन आसा. फायलीक अजून मंजुरी मेळूंक नाशिल्ल्यान डिजिटलायझेशनाचें काम आडखळून उरिल्ल्याची म्हायती खात्याचे मंत्री सुभाष फळदेसाय हांणी दिली.
पुरातत्व खात्यांत शेंकड्यांनी वर्सां पसूनची सुमार साडेतीन कोटी कागदपत्रां आसा. ही कागदपत्रां नश्ट जावपाच्या मार्गार आसतनाय तांच्या डिजिटलायझेशना कडेन सरकारान आडनदर केल्ल्याची बातमी उजवाडाक आयिल्ली. पूण हे विशींची निविदा जारी जाल्या. ह्या कामां खातीर 50 कोटींचो खर्च अपेक्षीत आसा. 300 कर्मचाऱ्यांक हें काम इन्फोटेक म्हामंडळाक दिल्या. हे फायलीक वित्त खात्या कडल्यान मंजुरी मेळूंक नाशिल्ल्यान डिजिटलायझेशनाचें कामाक अजून सुरवात जावंक ना. फायलीक मंजुरी मेळोवन घेवपाचे आपले यत्न झुजा पांवड्यार सुरू आसात, अशें मंत्री फळदेसाय हांणी सांगलें.
मजगतीं, गोंयाक शेंकड्यांनी वर्साचो इतिहास सांगपी आनी फुडले पिळगेक संशोधना खातीर म्हत्वाचीं थारपी सुमार एक कोटी कागदपत्रांचो आस्पाव आसा. तातूंत 16 व्या आनी 17 व्या शेंकड्यांतलीं सुमार एक कोटी कागदपत्रांचो आस्पाव आसा. गोंया सयत जगभरांतलो इतिहास संशोधक, अभ्यासक्रम लेगीत ह्या कागदपत्रांचो आदार घेवन इतिहासाचे संशोधन करीत आसात. पूण ह्या कागदपत्रांचो कागद ल्हव ल्हव नश्ट जायत चल्ला. फुडल्या कांय वर्सांत ती पुराय नश्ट जावपाक शकतात. ताका लागून तांचे बेगोबेग डिजिटलायझेशन जावप गरजेचें. पुरातन काळांतली ही ही सगलीं कागदपत्रां सध्या पुरातत्व खात्याच्या लॅबोरेटरींत दवरल्यात. तांची देखभाल योग्य तरेन करतात. पूण 16 आनी 17 व्या शेंकड्यांतलीं कागदपत्रां नश्ट जायत चल्ल्यात. ते खातीर सरकारान अदीक वेळ वगडायनासतना कागदपत्रांचे बेगोबेग डिजिटलायझेशन करप गरजेचें, अशेंय सुत्रांनी स्पश्ट केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
