भांगरभूंय | प्रतिनिधी
फातोड्डेंच्या डॉन बॉस्को ऑरेटरीन केळशींच्या सांताक्रूझ क्लबान आयोजीत केल्ली केळशीं व्हिलेजर्स युके करंड फुटबॉल सर्त जिखली. फायनलींत ताणें कुंकळ्ळी युनियनाक टायब्रेकरांत 5-4 अशा गोल फरकांनी हारयलो. फायनल केळशींच्या फादर ड्रन्स्टन अॅण्ड वॅलिंग्टन मैदानाचेर सर्तीचें आयोजन केल्लें.
एका वेळार डॉन बॉस्को एका गोलान फाटीं आशिल्लो. मॅचीच्या 20व्या मिनटाक मेव्हझेन ओलिव्हेरा हाणें मारिल्ली शूट गोलकीपर कॅरोल सुवारीस हाका वेवस्थीत आडावपाक जमलो ना. ताचो फायदो घेत मेवझेन ऑलिव्हेरानान बॉलाचेर आपलो ताबो मेळयलो आनी गोल करीत कुंकळ्ळीक 1-0 अशी आघाडी मेळोवन दिली.
दुसऱ्या अर्दांत डॉन बॉस्को ऑरेटरीन प्रतिस्पर्धी पंगडाचेर चेपण हाडलें आनी 1-1 अशी बरोबरी सादली. क्लेन्सियो पिंटोन ऋषिकेश गांवकाराक चकयत हो गोल केलो.
जैतिवंत पंगडाक 60 हजार आनी करंड फावो जालो, जाल्यार उप वस्ताद कुंकळ्ळीक 40 हजार आनी करंडाचेर समाधान मानचें पडलें.
यंग स्ट्रायकर्स बाणावलीक 10 हजाराचें विशेश इनाम फावो जालें.
हेर वैयक्तीक इनामांः रोझमन क्रूझ स्पोर्ट्स क्लब, नागोवा (शिस्तीचो पंगड), स्विटन रिबेलो (सर्तींतली पयली हॅट्रीक, डॉन बॉस्को ऑरेटरी, फातोड्डें), डॅन्झील फर्नांडीस (उत्कृश्ट डिफॅण्डर, कुंकळ्ळी युनियन), चार्ल्स मिरांडा (उत्कृश्ट मिडफिल्डर, डॉन बॉस्को ऑरेटरी, फातोड्डें), क्लेन्सियो पिंटो (उत्कृश्ट स्ट्रायकर, डॉन बॉस्को ऑरेटरी, फातोड्डें), ऋषिकेश गांवकार (फायनलींतलो उत्कृश्ट गोलकीपर, कुंकळ्ळी युनियन), मेव्हझेन ऑलिव्हेरा (फायनलींतलो पयलो गोल, कुंकळ्ळी युनियन), मॉवीन गांवकार (सर्तींतलो उदेंतो गोलकीपर, आर्लेम यूथ राय), रोनाल्डो कुएल्हो (सर्तींतलो उत्कृश्ट खेळगडो, बेताळभाटी स्पोर्टिंग).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
