भांगरभूंय | प्रतिनिधी
भांगरभूंय । प्रतिनिधी
पणजीः सध्या चलता त्या रस्तो सुरक्षा सप्तकाचे फाटभुंयेर फाटल्या 9 म्हयन्यांत जाल्ली अपघातांची आंकडेवारीचेर नदर मारल्यान राज्यांत सरासरी एक दिसांत 8 अपघात आनी दर 34 वरांक एकलो मरता अशी धपको दिवपी गजाल सामकार आयल्या. फाटल्या सप्टेंबर म्हयन्यांत 30 जाणांकअपघाती मरण आयलें. तातूंत 11 दुचाकी चलोवपी आनी रस्त्यान चलप वचपी लोकांचो आसपाव आसा. पोरूं वर्साचे तुळेंत फाटल्या 9 म्हयन्यांत 13.97 अशी अपघातांत आनी 27.45 टक्के मरणात वाड जाल्या अशी म्हायती पुलीस खात्यांतल्या येरादारी विभागांकडेन आशिल्ल्या आंकडेवारी वयल्यान मेळ्ळ्या.
राज्यांत फाटल्या जानेवारी ते सप्टेंबर ह्या 9 म्हयन्यांत 2,244 अपघातांत 195 जाणांक जीव वोगडावचे पडले. तातूंत 112 दुचाकी चालकांचो आनी तांच्या फाटल्यान बशिल्ल्या 18 जाणांचो आसपाव आशिल्लो. रस्त्यान चलपी 37, 13 प्रवासी, 9 ड्रायव्हर, एक सायकलस्वार आनी हेर 5 जाणांचो आसपाव आसा. 2021 वर्साच्या 9 म्हयन्यांत जाल्ल्या अपघात आनी मरणाचे तुळेंत मरणाचें हें प्रमाण 85.71 टक्क्यांनी वाडला अशें दिसून आयलां. 2021 वर्सा 9 म्हयन्यांत 1,969 अपघातांत 153 जाणांक मरण आयिल्लें. तातूंत 93 दुचाकी चालक, फाटल्यान बशिल्ले 15 जाण, रस्त्यान चलपी 22 जाण, ड्रायव्हर 13, सात प्रवासी, 4 सायकलस्वार आनी हेरांचो आसपाव आशिल्लो.
सप्टेंबरांत दिसाक एक मरण
फाटल्या सप्टेंबर म्हयन्यांत 235 अपघातांत 30 जाणांक मरण आयलें. तातूंत 11 दुचाकी चालकांचो आसपाव आसा 29 जाणांक गंभीर दुखापत जाली. पोरूं सप्टेंबर म्हयन्यांत 228 अपघांतां 11 दुचाकी चालक, फाटल्यान बशिल्ल्या दोगांक, दोन प्रवासी आनी एका सायकलस्वाराक जीव वोगडावचो पडलो. अदूं 9 म्हयन्यांत 186 जाणाक गंभीर दुखापत जाली जाल्यार 574 जाणांक किरकोळ मार बसलो. अपघाताक लागून 1,525 वाहनांचे लुकसाण जाले. पोरूं ह्याच काळांत 143 जाणांक गंभीर दुखापत जाली. 1,431 वाहनांचें लुकसाण जालें.
1.96 लाखांची दंड वसुली
सप्टेंबर म्हयन्यांत 29,830 वाहन चालकां कडल्यान येरादारी नेम मोडिल्ल्यान 1 कोटी 96 लाख 36 हजार 500 रुपयांची दंड वसुली केली. 2021 वर्सा ह्याच म्हयन्यांत 37,615 जाणां कडल्यान 42 लाख 11 हजार, 950 रुपये दंड वसुली केल्ली. मोटर वाहन कायद्या खाला दंडात वाड केल्ल्यान अंदू दंड वसुली चड जाल्या. फाटल्या 9 म्हयन्यांत 3,87,629 वाहन चालकां कडल्यान 13 कोटी 46 लाख 11 हजार 300 रुपयांचो दंड वसूल केलो. पोरू ह्याच काळांत 6 कोटी 89 लाख 40 हजार 550 रुयांची वसुली केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
