भांगरभूंय | प्रतिनिधी
जिल्हो पंचायत पोटवेंचणुकेंत मतदारांची मतदान करपाक निरशेवणी
भांगरभूंय । प्रतिनिधी
पणजी : जिल्हो पंचायत पोटवेंचणुके खातीर मतदारां मदीं निरशेवणीचेंच दर्शन जालें. तिनूय जिल्हो पंचायतीं खातीर सरासरी 46.66 टक्के मतदान जालें. 2020 वर्सा जाल्ल्या जिल्हो पंचायत वेंचणुकेंत सरासरी 56 टक्के मतदान जाल्लें. हें मतदान लागीं लागीं 10 टक्के उणें आसा. फाल्यां 18 ऑक्टोबराक मतमेजणी जातली.
मतदान शांतिकायेन जाल्ल्याचो दावो राज्य वेंचणूक आयोगान केल्लो आसलो तरी कुठ्ठाळीचे अपक्ष उमेदवार मर्सिआना वाझ हांचे कडल्यान आचार संहितेचो भंग जाल्ल्याचो आरोप काँग्रेसीचे कार्यकर्ते ओलेंसिओ सिमोयश हांणी केला. रेईश मागूश मतदारसंघात 43.94 टक्के, दवर्ली मतदारसंघात 50.52 टक्के जाल्यार कुठ्ठाळी मतदारसंघात 45.07 टक्के मतदान जालें. तिनूय मतदारसंघांची सरासरी टक्केवारी 46.66 टक्के जाता.
तिनूय मतदारसंघानी मतदानाचें
प्रमाण लागीं लागीं फाटले वेंचणुके इतलें
जिल्हो पंचायत पोटवेंचणुकेंत पयलीं सावन उमेद नाशिल्ली. उमेदवार तशेंच समर्थक नेटान प्रचार करताले. तरी मतदारां मदीं उमेद नाशिल्ली. हाका लागून मतदान उणें जावपाचो अदमास आशिल्लोच. मतदान सामकेंच उणें म्हणल्यार 50 टक्क्यां सकयल जालें.
2020 वर्सा सार्वत्रीक जिल्हो पंचायत वेंचणूक जाल्ली. त्या वेळार सरासरी मतदान 56.82 टक्के जाल्लें. उत्तर गोंयांत 58 टक्के जाल्यार दक्षीण गोंयांत 55 टक्के मतदान जाल्लें. रेईश मागूश, दवर्ली आनी कुठ्ठाळी मतदारसंघांचो विचार करीत जाल्यार 2020 वर्सा लेगीत उणेंच मतदान जाल्लें. 2020 वर्सा दवर्ले 50.56 टक्के मतदान जाल्लें. हे खेपे तें 50.52 टक्के जालां. दवर्ले फाटले खेपे इतलेंच मतदान जाल्लें. फाटले खेपो रेईश मागूश मतदारसंघांत 46.15 टक्के मतदान जाल्लें. हे खेपे 43.94 टक्के मतदान जालें. हे खेपे 3 टक्के मतदान उणे जालें. 2020 वर्सा कुठ्ठाळी मतदारसंघात 46.62 टक्के मतदान जाल्लें. हे खेपे 45.07 टक्के मतदान जालें. ह्या वेळार 1 टक्के मतदान उणें जालें.
फाटले खेपे हेर मतदारसंघांनी चड मतदान जाल्लें. हाका लागून सरासरी मतदान 56 टक्क्यांचेर पाविल्लें.
दादल्या परस बायलां मतदारांचें प्रमाण चड
तिनूय मतदारसंघांनी मेळून दादल्या परस बायलां मतदारांचे प्रमाण चड आशिल्लें. मतदान लेगीत बायलांचे चड जालां. 13055 बायलांनी जाल्यार 12850 दादल्यांनी मतदान केलें. दादल्या मतदारांचो आंकडो 27190 जाल्यार बायलां मतदारांचो आकडो 28329 आसा.
अपक्षा कडल्यान आचारसंहितेचो भंग, काँग्रेसीचो आरोप
पोटवेंचणुकेंत कायदो सुवेवस्थेचो प्रस्न निर्माण जालो ना. मतदान शांतिकायेन पार पडलें. आमदार आंतोन वाज हांच्या समर्थकां कडल्यान आचारसंहितेचो भंग जाला, असो आरोप काँग्रेसीचे कार्यकर्ते ओलेंसियो सिमोईय हांणी केलाे. लोकशाय नश्ट करपाचे भाजपाचे यत्न सुरूच आसात, असो आरोप प्रदेश काँग्रेस अध्यक्ष अमीत पाटकार हांणी केलाे. आंतोन वाझ हांची घरकान्न मार्सेलिना वाझ हांकां भाजपाचो तेंको आसा.
म्हाका कोणूच राजकी गॉडफादर ना. लोकांचो वेंचणुके वेलो विस्वास उणो जायत आसा. हाका लागून मतदान उणें जावप शक्य आसा, अशें रेईश मागूशचे अपक्ष उमेदवार राजेश दाभोळकार हांणी म्हणलें.
म्हजें जैत निश्चीत आसा. वेंचणूक एकतर्फी जातली अशें भाजपाचे रेईश मागूशचे उमेदवार संदीप बांदोडकार हांणी म्हणलें. काँग्रेसीचे रेईश मागूशचे उमेदवार प्रगती पेडणेंकार हिणे लेगीत जैताचो दावो केला.
मतदारसंघ : रेईश मागूश
2020 – 46.15 टक्के
2022 – 43.94 टक्के
……………………………….
मतदारसंघ : दवर्ली
2020 – 50.56 टक्के
2022 – 50.52 टक्के
………………………..
मतदारसंघ : कुठ्ठाळी
2020 – 46.62 टक्के
2022 – 45.07 टक्के
…………………
तिनूय मतदारसंघांतलो मतदानाचो आंकडो
मतदारसंघ दादले बायलां वट्ट मतदार
रेईश मागूश 4280 3834 8114
दवर्ली 5146 4968 10114
कुठ्ठाळी 3424 4253 7677
12850 13055 25905
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
