भांगरभूंय | प्रतिनिधी
पणजी, प्रतिनिधी : पुलीस उपअधीक्षक पदां खातीरच्या शरिरीक चाचणेंत ६२ फकत ११ उमेदवार पास जाले. २८ पदां भरपाची आशिल्ल्यान फकत ११ उमेदवार पास जाल्ल्यान तांचो उणाव दिसून येता. गोंय लोकसेवा आयोगाची परीक्षा आनी भरती प्रक्रिया उच्च दर्जाची आसता. हेर पदां खातीर ज्यो परिक्षा जातात तातूंतय पास जावप्यांचें प्रमाण सादारण आसता. परिक्षेचो दर्जो कोणूच देंवयना, अशें गोंय लोकसेवा आयोगाचे अध्यक्ष जुझे नोरोन्हा हांणी सांगलें.
उपअधीक्षक पदा खातीरच्या शरिरीक तपासणेचो निकाल १७.७४ टक्के आसा. कनिश्ठ श्रेणी अधिकारी वा हेर पदां खातीर जावपी पदां खातीर जावपी परिक्षांचोय निकाल १५ ते २० टक्के इतलोच आसता. अशी स्थिती हेर राज्यांनीय आसा. अभ्यासा खातीर मेहनत घेवप्यांक येस नक्की मेळटा. ह्यान पयलीं ११ नागरी सेवा अधिकार्यांंचीं पदां भरपा खातीर परिक्षा जाली. हजारांनी उमेदवार आशिल्ले. फकत चारूच जाण पास जाले. ११ पदां भरपा खातीर तीन खेपो जायरात दिवन भरती करची पडली.
पुलीस उपअधीक्षक भरतीच्या शरिरीक चाचणे उपरांत ११ उमेदवार पात्र थारल्यात. तांकां आतां लेखी परीक्षा आनी मुलाखत दिवची पडटली. तातूंत पास जावपी पुलीस उपअधीक्षक पदां खातीर पात्र थारतले. रित्या पदां खातीर परत जायरात दितले. नापास जाल्ले उमेदवारूय परत अर्ज करपाक शकतात, अशेंय नोरोन्हा हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
