भांगरभूंय | प्रतिनिधी
अलाहाबाद, खबरां संस्था: पळून आपले इत्सेन लग्न करपी जोडप्यांक समाजाक तोंड दिवचें पडटलें, अशें अलाहाबाद उच्च न्यायालयान म्हणलां. फकत पळून वचून लग्न करपाक संरक्षण दिवपाक मेळचें ना, अशेंय कोर्टान सांगलें. आपली जीण आनी स्वातंत्र्याक धोको आसा हें तांकां सिद्ध करचें पडटलें अशें कोर्टान नमूद केलें.
चित्रकूटचे श्रेया केसरवानीचे याचिकेचेर निकाल दितना न्यायमूर्ती सौरभ श्रीवास्तव हांणी ही टिप्पणी केली. चित्रकूटांतल्या कार्वी पुलीस स्टेशन हद्दींतली श्रेया हिणें न्यायालया कडेन मागणी केल्ली, विरोध करप्यांनी तिचे सुखी लग्न जिणेंत हस्तक्षेप करचो न्हय अशें निर्देश दिवचे.
याचिकाकर्त्यांच्या वकिलान युक्तिवाद केलो, लग्न करपी जोडपें प्रौढ आशिल्लें. जिल्लो विवाह अधिकार्यां कडेन नागरी लग्ना खातीर अर्ज सादर केला. कुटुंबाचे इत्स आड तांणी लग्न केलें. तांच्या कुटुंबांतले वांगडी तांकां कितेंय करपाक शकतात असो तांकां भंय आसा. हे चलयेचेर ह्यान पयलींय बरेच अत्त्याचार जाल्यात. अशे परिस्थितींत तांकां संरक्षण दिवपाक जाय.
न्यायालयान म्हणलें…
याचिकाकर्त्यांनी चित्रकूटचे एसपींक निवेदन दिलां. प्रत्यक्ष धोक्या प्रमाण पुलीस कायदेशीर कारवाय करपाक शकतात. याचिकाकर्त्यांक गंभीर धोको आसा आनी तांकां संरक्षण दिवपाक जाय हें दाखोवपी कसलेच तरेचे पुरावे रेकॉर्डाचेर ना. याचिकाकर्त्यांचेर शशरिरीक वा मानसीक हल्ल्याचो कसलोच पुरावो सादर करूंक ना.
पुलीस संरक्षण दिवपाचें कसलेंच कारण ना
खंयच्याय बेकायदेशीर वागणुके विशीं एफआयआर नोंद करपा खातीर याचिकाकर्त्यांनी संबंदीत पुलीस स्टेशनांत कसलोच अर्जूय दिवंक ना. तशेंच गुन्यांव नोंद करपा खातीर कसलेच पुरावे सादर करूंक ना. अशे परिस्थितींत, पुलिसांनी संरक्षण दिवपाचें कसलेंच कारण ना, अशें कोर्टान याचिका निकालांत हाडटना सांगलें. कसलीय समस्या जाणवल्यार अर्ज सादर करचो. जाचे उपरांत पुलीस योग्य ती कारवाय करतले अशेंय कोर्टान म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
