भांगरभूंय | प्रतिनिधी
तेलंगणाच्या कार ड्रायव्हराक अटक
म्हापशें, प्रतिनिधी ः प्री वेडिंग फोटो शूटा खातीर गाडयेचेर चडून फोटो काडपी तेलंगणाच्या एका तरणाट्या पर्यटकाक बरेंच म्हारग पडलें. ह्या प्रकरणांत संबंदीत ड्रायव्हराक पुलिसांनी ताब्यांत घेतलो. ही घडणूक बुधवारा सांजेच्या 4.30 वरांचेर खोर्जुवेंच्या पुलाचेर घडली.
म्हापशें पुलिसांनी दुबावीत नसाडोबाईन महेश (तेलंगण) ह्या कार चालकाक अटक केल्या. ताचे आड गुन्यांव नोंद केला. तेलंगणाचो पर्यटक टी एस 36 एफ 9369 क्रमांकाच्या ब्रिझा कारीचेर वयर चडून प्री वेडिंग फोटोशूट करतालो. फोटो काडपा खातीर न्हवरो गाडयेच्या टपाचेर बसून पोज दितालो. ह्या वेळार ड्रायव्हरान गाडयेचीं पार्किंग लायट पेटयल्लीं.
गाडयेच्या टपाचेर बशिल्ल्या न्हवऱ्याचो व्हिडियो व्हायरल जातकच म्हापशें पुलिसांक म्हायती मेळिल्ली. तांणी गाडयेंतल्या पांचूय पर्यटकांक ताब्यांत घेतले. उपरांत दुबावीत गाडी चालकाचेर निश्काळजीपणान गाडी चलोवप, परवानो नेम मोडप आनी मनशाच्या जिवाक धोको निर्माण करप ह्या आरोपांत गुन्यांव दाखल करून अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
