प्राणीमित्रांचेर सरकाराची आडनदर

भांगरभूंय | प्रतिनिधी

प्राणीमित्र अमृतसिंगान उक्तायली खंत

भांगरभूंय । नारायण गांवस
पणजीः गोंयांत फाटलीं साबार वर्सां निसुवार्थीपणान सेवा करपी सर्पमित्रांक अजून लेगीत योग्य तो मान सरकारा कडल्यान मेळूंक ना. गोंयांत सध्या रानवटीं जनावरां, विखारी सोरोप लोकवसतींत घुसपाच्यो घडणुको वाडल्यात. दर वर्सा सुमार 4500 सोरपांक रेस्क्यू मंडळा कडल्यान जिवदान दितात. पूण ह्या प्राणीमित्रां खातीर सरकारान कांयच करूंक ना, अशी खंत प्राणीमित्र अमृतसिंग हांणी उक्तायली.
अॅनिमल रेस्कू स्कॉड अमृतसिंग आनी ताचे सांगाती कितलीशींच वर्सां चलयतात. लोकवसतींत घुसपी सोरपांक जिवदान दितात, पूण ह्या सर्पमित्रां खातीर अजून मेरेन कसलेंच धोरण आखिल्लें ना. ह्या सर्पमित्रांक सरकारी सेवेंत पूर्ण वेळ घेवचे, प्राणीमित्र म्हूण खास पदांची निर्मिती करून सेवेंत घेवचे, अशी मागणी अॅनिमल रेस्कू स्कॉडान केल्ली. पूण उपरांत रान खात्या वतीन फक्त 40 प्राणीमित्रांक आतां मेरेन दिसवड्याचेर रान खात्यांत घेतल्यात. तातूंतले कांय प्राणीमित्र फाटल्या 10 वर्सां सावन दिसवड्याचेर काम करतात. तांकां फक्त 14 हजार रुपया पगार दितात. तशेंच गोंयांतल्या विवीध म्हालांनी रान खात्याच्या कार्यालयांत कांय सर्पमित्रांची नेमणूक केल्या, पूण तांकां खूब पयसुल्ल्यान येवचें पडटा.
जखमी जनावरां खातीर हॉस्पिटल नाः देसाय
फाटल्या कांय वर्सां सावन लोकवसतींत जखमी अवस्थेंत प्राणी मेळपाच्यो घडणुको घडटात. सोरोप, सुकणी, तशेंच हेर सरपटपी प्राणी जखमी अवस्थेंत मेळटात. पूण तांचेर योग्य उपचार करचे खातीर कसलेंच हॉस्पिटल ना. फक्त बोंडला प्राणी संग्रहालयांत एकेच कडेन जखमी जनावराचेर उपचार करतात. पूण जंय प्राणीमित्रांनी धरिल्ल्या जखमी जनावरांचेर उपचार करपाक मेळना. ताका लागून खास जनावरांच्या दोतोरांक दाखोवचें पडटा, अशें सर्पमित्र करण देसाय हांणी सांगलें.
घरांत घुसपी जखमी जनावरांक, विखारी सोरपांक धरप खूब कठीण आसता. खंयच्याच प्रशिक्षणा बगर हें काम करप जिवाचेर येवं येता. हे आदीं अशें सोरोप कांय सर्पमित्रांक चाबल्यात. पूण अशा सर्पमित्रांक सरकारा कडल्यान कसलेच तरेचो विमो ना. अशा वेळार जर प्राणीमित्र जखमी जावन ताका मरण आयलें जाल्यार ताच्या कुटुंबाक कांयच मेळचें ना. ताका लागून सरकारान हाचो विचार करून तांचे खातीर कांय येवजण्यो तयार करच्यो, अशें देसाय हांणी सांगलें.