भांगरभूंय | प्रतिनिधी
थकबाकी वसुली सयत वीज पुरवण सुदारणेक प्राधान्य दिवपाची मागणी
भांगरभूंय । प्रतिनिधी
पणजीः सामान्य वीज गिरायक, बिगर सरकारी संघटणा तशेंच विरोधी राजकी पक्षांनी प्रस्तावीत वीज दरवाडीक भौशीक सुनावणी वेळार विरोध केलो. थकबाकी वसूल करपा सयत वीज पुरवण सुदारणेक प्राधान्य दिवचें, अशी मागणी विरोधी पक्ष आनी लोकांनी केली.
घरगुती तशेंच उद्देगीक वीज बिलांचे दर वाडोवपाचो प्रस्ताव आसा. हाचे खातीर सोमारा पणजे मिनेझीस ब्रागांझा सभाघरांत भौशीक सुनावणी जाली. जोड वीज नियमन आयोगाच्या अधिकाऱ्यां सयत वीज खात्याचे अधिकारी, राजकी पक्षांचे प्रतिनिधी तशेंच सामान्य लोक बसकेक हाजीर आशिल्ले.
2 ते 200 युनिटा मेरेन वीज वापरपी गिरायकां खातीर ही वाड 6 टक्के आसतली. सादारणपणान ही वाड 3.48 टक्के आसतली. 0 ते 200 युनीट मेरेन वीज वापरपी गिरायकांचो आंकडो 4 लाख आसा. नवी सबस्टेशनां तशेंच मुळाव्या सुविधांचेर खात्याक बरोच निधी खर्च करचो पडटा. फुडल्या 25 ते 30 वर्सांचो विचार करून मुळाव्या सुविधा तयार करच्यो पडटात. हाचे खातीर वीज दरवाड करपा बगर पर्याय ना, अशें मुखेल वीज अभियंते स्टीफन फर्नांडीस हांणी सांगलें.
काँग्रेस तशेंच आम आदमी पक्षान वीज दरवाडीक विरोध केलो. गोवा कॅनचे संघटक रोलँड मार्टिन्स तशेंच हेर सामान्य लोकांनी वीज दरवाडीक विरोध केलो.
विलांची वीज पुरवण बंद करची: काँग्रेस
दर्यादेग वाठारांनी खूबशे विला तयार जाल्यात. घरगुती विजेची जोडणी घेवन ते पर्यटकां खातीर विलांचो वापर करतात. गोंयांत सुमार 1 हजार विलांचो वापर मान्यताय नासतना पर्यटकां खातीर जाता. ह्या विलांचेर कारवाय जावपाक जाय. सामान्य मनशाक विजेचो उणाव जाणावतना विलांक घरगुती दरांन वीज पुरवण कित्याक? असो प्रस्न प्रदेश काँग्रेस अध्यक्ष अमीत पाटकार हांणी केलो.
वेव्हारांत पारदर्शकताय ना: आप
वीज खात्याचो वेव्हार आनी कार्यपद्दत पारदर्शक ना. विजेचे गळटीचेर नियंत्रण ना. विजेचे गळटेंत चोरयेचें प्रमाण चड आसा. वेवसायीक कारणाक लागून वीज दरवाडीचो प्रस्ताव खात्यान दवरला. खातें वेवसायीक पद्दतीन वावर करिना, तरी लेगीत खर्चा खातीर विजेचे दर वाडोवपाचो प्रस्ताव दवरता. दिल्लींत आप सरकार 200 ते 300 युनीट मेरेन वीज फुकट दिता, अशें सांगून आमदार वेंझी व्हिएगस हांणी दरवाडीक विरोध केलो.
विजेचे बचतीविशीं जागृताय जाय: गोवा कॅन
विजेचो योग्य तरेन वापर करपा सयत बचत करपाविशीं गिरायकांमदीं जागृताय करपाची गरज आसा. सुरळीत वीज पुरवण जायना. गिरायकांच्यो कागाळी सुटाव्यो जायनात. वीज दरवाडीक विरोध आसा, अशें गोवा कॅनचे रोलँड मार्टिंन्स हांणी सांगलें.
हेर राज्यांनी कोळसो जळोवन वीज तयार जाता, म्हूण गोंयाक वीज मेळटा, अशें विधान मुखेल वीज अभियंते स्टीफन फर्नांडीस हांणी केलें. हाका लेगीत आपाचे फुडारी अॅड. अमीत पालेकार हांणी हरकत घेतली. कोळशा परस सवाय दरांत वीज निर्मिती करपाचे पर्याय आसात. सरकार हाचेर विचार करिना. कोळसो सोडून हेर मार्गान वीज निर्मिती करपा कडेन लक्ष दिवपाची मागणी अॅड. अमीत पालेकार हांणी केली.
नवीं सबस्टेशनां उबारपा सयत ट्रान्सफॉर्मरांचेर बरोच पयसो खर्च जाला. तरी लेगीत लोकांक सारकीं वीज पुरवण जायना. कागाळ दिली जाल्यार वीज पुरवण सुरळीत जावपाक उशीर जाता. वापरा परस विजेचीं बिलां चड येतात. वीज बिलांची जी थकबाकी आसा ती वसूल करची, विजेची गळटी पयस करची. वीज दरवाड हो उपाय न्हय, अशें मत बऱ्याच जाणांनी उक्तायले. प्रदेश काँग्रेस अध्यक्ष अमीत पाटकार, आपाचे मुखेली अॅड. अमीत पालेकार, आमदार वेंझी व्हिएगस सुनावणेक हाजीर आशिल्ले.
मंगळारा मडगांवां भौशीक सुनावणी जातली. जोड वीज नियमन आयोगान मान्यताय दिले उपरांत 1 एप्रीलाच्यान वीज दरवाड लागू जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
