भांगरभूंय | प्रतिनिधी
पणजी : गोंयांत वाग वाठार जालो जाल्यार लोकांचीं घरां विस्थापीत जातलीं, तशेंच लाखभर लोकांच्या पाटोपाणयाचो प्रस्न निर्माण जातलो. वाग वाठारा खातीर गोंय पात्र थारना, असो दावो करूत लोकांनी प्रस्तावीत वाग वाठाराक विरोध केलो. लोकां सयत रानां मंत्री विश्वजीत राणे, आमदार देविया राणे, सभापती आनी सांवड्डेंचे आमदार गणेश गांवकार, सांगेंचे आमदार समाजकल्याण मंत्री सुभाष फळदेसाय हांणी प्रस्तावीत वाग वाठाराक विरोध केलो. गोंय फावंडेशनाचे क्लॉवड अल्वारीस आनी पर्यावरण कार्यकर्ते राजेंद्र केरकार हांणी वाग वाठाराचें समर्थन केलें.
प्रस्तावीत वाग वाठाराक गोंय सरकाराचो विरोध आसा. उच्च न्यायालयाच्या आदेशाक गोंय सरकारान सर्वोच्च न्यायालयांत आव्हान दिलां. हे आव्हान याचिके विशीं सर्वोच्च न्यायालयान केंद्रीय उच्चाधिकार समिती (सीईसी) स्थापन केल्या. ही समिती सरकार, लोकप्रतिनिधी आनी पर्यावरणवाद्यांचें म्हणणें आयकून घेवन सर्वोच्च न्यायालयाक अहवाल सादर करतली. समितीचे वांगडी चंद्रप्रकाश गोयल आनी सुनिल लिमये हे बिरेस्तारा गोंयांत आयले. बिरेस्तार आनी शुक्रार अशें दोन दीस हे वांगडी गोंयांत आसात. बिरेस्तारा सचिवालयांत आमदार, थळावे लोक तशेंच पर्यावरणवाद्यांच्यो सुचोवण्यो आनी हरकती तांणी आयकून घेतल्यो.
वाळपय, पर्यें, सांवड्डें, सांगें आनी काणकोण ह्या पांचूय मतदारसंघांतल्या लोकांनी वाग वाठाराक विरोध केला.
लेखी स्वरूपांत हरकती सादर : विश्वजीत राणे
वाग वाठार जालो जाल्यार वाळपय मतदारसंघांतल्या लोकांक कशें त्रास जातले, तें आमी लेखी स्वरुपांत समिती कडेन मांडलां. लोकांच्यो भावना आमदार ह्या नात्यान हांवें मांडल्यात. लोकांच्या सुचोवण्यांचो विचार करून समिती अहवाल सादर करतली, अशें रानां मंत्री विश्वजीत राणे हांणी सांगलें.
वाग नात, येतात ते भायले : देविया राणे
वाग वाठार जाहीर करतले जाल्यार 80 ते 90 वाग आसचे पडटात. म्हादय अभयारण्यांत केन्नाय एकादो, दुसरो वाग दिसता. तो वाग लेगीत शेजारच्या राज्यांतल्यान येता. पर्यें मतदारसंघांतले लोक शेतीचेर निंबून आसात. वाग वाठार जालो जाल्यार शेतीचेर निर्बंध येतले. गोंय हें ल्हान राज्य आसा. हातूंत पांच अभयारण्यां आसात. हे भायर सीआरझॅडचे निर्बंध आसात. सगले विशय लोकां सयत हांवें सीईसी कडेन मांडल्यात, अशें आमदार देविया राणे हांणी सांगलें.
दुयेंसा प्रमाण वखदाची गरज : गणेश गांवकार
सध्या जी स्थिती आसा, ती बरी आसा. वाग वाठार जालो जाल्यार बरें जातलें, अशें कांय लोक म्हणटात. मात दुयेंसा प्रमाण वखदाची गरज आसता. वाग वाठार जाहीर करपाची गरज ना. लोकांच्यो समस्या हांवें समिती मुखार मांडल्यो, अशें सभापती आनी सांवड्डेंचे आमदार गणेश गांवकार हांणी सांगलें.
एका वागा खातीर 20 हजार लोक रस्त्यार कित्याक? : सुभाष फळदेसाय
एका वागा खातीर सांग्या वयल्या 20 हजार लोकांक रस्त्यार काडचे पडटले. वाठारांत 6 हजार गोरवां आसात. साळजिणी, काजुकट्टो वाठारांत रावपी लोकांक अभयारण्याक लागून पयलींच त्रास जातात. रानां खात्याचे अधिकारी लोकांक खुबूच त्रास दितात. लोकांच्या जीविताक लागून वाग वाठार सांग्याक परवडचो ना, अशें समाजकल्याण मंत्री आनी सांगेंचे आमदार सुभाष फळदेसाय हांणी सांगलें.
पर्यावरणवाद्यांचो वाग वाठाराक तेंको
गोवा फावंडेशनाचे क्लावड अल्वारीस तशेंच पर्यावरण कार्यकर्ते राजेंद्र केरकार हांणी वाग वाठाराक तेंको दिलो. गोंयांत सध्या 5 वाग आसात. ह्या वागांचे सुरक्षे खातीर वाग वाठार जावपाक जाय, अशें राजेंद्र केरकार हांणी सीईसी वांगड्यांची भेट घेतले उपरांत सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
