भांगरभूंय | प्रतिनिधी
फाल्यां राष्ट्रीय खेळां सर्तीच्या उक्तावणाक प्रधानमंत्री रावतले हाजीर
पणजी: राष्ट्रीय खेळां सर्तीच्या उक्तावण सुवाळ्या खातीर फाल्यां (बिरेस्तारा) येत आशिल्ले प्रधानमंत्री नरेंद्र मोदी हांचो ताफो दाबोळी विमानतळ, टायटन सर्कल, कोलवा जंक्शन मार्गान फातोड्डें स्टेडियमार वतलो. ताका लागून सांजवेळा 6 उपरांत हो मार्ग हेर येरादारी खातीर बंद आसतलो. प्रधानमंत्री स्टेडियमार पावले उपरांत तो परतून सुरू करतले. पूण रातीं आठ उपरांत ताफो परतून दाबोळी पाव मेरेन हो मार्ग बंद करतले अशी म्हायती मुख्यमंत्री डॉ. प्रमोद सावंत हांणी मंगळारा दिली.
राष्ट्रीय खेळां सर्तीच्या उक्तावण सुवाळ्याच्या नियोजनाचो नियाळ घेतले उपरांत ते पत्रकारां कडेन उलयताले. ह्या वेळार खेळां मंत्री गोविंद गावडे, मुख्य सचीव पुनीत कुमार गोएल, पुलीस म्हासंचालक जसपाल सिंग, खेळां सचीच स्वेतिका सचन आनी हेर अधिकारी हाजीर आशिल्ले.
प्रधानमंत्र्याचो ताफो ह्या मार्गा वेल्यान येवपा वचपाच्या अर्द वरां पयलीं सावन बंद आसतलो. तशेंच कोलवें सावन मडगांवां येवपी मुखेल रस्तोय बंद करतले. पूण हेर समांतर रस्त्या वेल्यान येरादारी सुरू उरतली. सांजवेळा 5.30 वरां उपरांत फातोड्डें स्टेडियमा कुशीक आशिल्ले सगले रस्ते बंद करतले अशें मुख्यमंत्र्यांनी म्हणलें.
ज्या निमंत्रितांक पास मेळ्ळ्यात तांणी 4.30 पयलीं स्टेडियमार पावप गरजेचें आसा. उपरांत तांकांय भितर सोडचे नात. उक्तावण सुवाळ्याची कार्यावळ 4 ते 6 मजगतीं जातली. ह्या वेळार केंद्रीय खेळां मंत्री अनुराग ठाकूर तशेंच गोंयचे खेळां मंत्री गोविंद गावडे हांचीं उलोवपां जातलीं. उपरांत गायिका हेमा सरदेसाय तशेंच बॉलिवूड गायक सुखविंदर सिंग हांच्या संगिताची कार्यावळ जातली.
प्रधानमंत्री मोदी 6.30 ते 8.30 मेरेन कार्यावळींत हाजीर आसतले. तांचें मुखेल भाशण जाले उपरांत 600 कलाकार राष्ट्रीय एकात्मते वेली कार्यावळ सादर करतले. प्रधानमंत्री गेले उपरांत लेगीत एक वर विवीध सांस्कृतीक कार्यावळी सादर जातल्यो. ह्या वेळार ड्रोन शो हें खाशेलें आकर्शण आसतलें. हे कार्यावळी खातीर विशेश पार्कींग वेवस्था केल्या. हांगा गाडयो पार्क करून उपरांतूच स्टेडियमाचेर प्रवेश दितले. फक्त व्हीआयपी लोकांच्यो गाडयोच स्टेडियमा भितर पार्क करतले अशेंय मुख्यमंत्री डॉ. प्रमोद सावंत हांणी सांगलें.
नियोजन पूर्ण; यंत्रणा सज्ज
– 26 वेर मडगांवच्या सरकारी कर्मचाऱ्यांक अर्दो दीस काम
– खेळां सर्तीची मशाल प्रधानमंत्री नरेंद्र मोदी हांकां कात्या कुएल्हो हांचे वतीन दितले.
– उक्तावण सुवाळ्याक 5 हजार विद्यार्थी, 7 हजार प्रेक्षक हाजीर रावतले.
– कार्यावळीक अरुणाचल प्रदेश, आसाम आनी ओडिशाचे खेळां मंत्री हाजीर रावतले.
– सर्ती खातीर पणजी, कांपाल, मडगांव, म्हापशें, वास्को आनी फोंडें अशें 6 क्लस्टर केल्यात.
– दरेक क्लस्टराची जापसालदारकी एका पुलीस अधिक्षकाक दिल्या.
– सर्ती खातीर गोमॅकाँत विशेश 24 वरां सेवा दिवपाचें दालन सुरू केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
