भांगरभूंय | प्रतिनिधी
काणकोण: केंद्र सरकाराच्या प्रधानमंत्री स्वदेश दर्शन येवजणे खाला मेळपी निधींतल्यान काणकोणच्यो दर्यादेगो, इको टुरिझम, देवस्थानां, चर्ची, घसघशे आनी हेर पर्यटन थळांचे सोबितीकरण करपा बरोबरूच थंय सगल्यो सुविधा दितले. काणकोणच्यो दोन तरी दर्यादेगो ब्लू फ्लॅग बीच म्हूण तांकां प्रमाणपत्र मेळचें हे खातीर पंचायतींनी, नगरपालिकांनी हें प्रमाणपत्र मेळोवपाचे नदरेन कार्यरत रावूंक जाय अशें पर्यटन मंत्री रोहन खंवटे हांणी सांगलें.
काणकोणचे आमदार आनी सभापती रमेश तवडकार हांणी तांकां काणकोणां आपयिल्ल्यान ते दोन दिसांचे भोंवडेर काणकोणां आसात. तांचे बरोबर पर्यटन खात्याचे संचालक निखील देसाय, पर्यटन म्हामंडळाचे वेवस्थापकी संचालक ब्रिजेश, पर्यटन खात्याचे सचीव संजीव आहुजा आनी हेर अधिकारी हाजीर आशिल्ले.
दाबोळी विमानतळ लेगीत सुरूच उरतलो. कोणेच भियेवपाची गरज ना अशें सांगून दर्यादेगांचेर आनी हेर पर्यटन थळांचेर सगल्यो सुविधा दिवपा खातीर आयज (शुक्रारा) त्या वाठाराची पळोवणी करतले. ते खातीर पर्यटन खात्याचे अभियंते, आर्किटेक्ट लेगीत हे बसकेक हाजीर राविल्ल्याचें तांणी म्हणलें.
कोणकोण म्हालाक सैमाची देणगी मेळ्ळ्या. ती देणगी पर्यटकांक भुलयता. इको, एग्रो टुरिझमाचेर भर दिल्ल्ल्यान रोजगाराचो व्हड प्रमाणांत प्रस्न सुटावो जातलो. पर्यटन वेवसायाक लागून व्हड प्रमाणांत रोजगार मेळत आशिल्ल्याचें तांणी म्हणलें.
आपल्या वाठारांतल्या दर्यादेगांची, पर्यटन थळांची नितळसाण, सोबीतकाय बरी दवरपा खातीर लोकांनी लेगीत सहकार्य करूंक जाय, तेन्नाच पर्यटक व्हड प्रमाणांत येत आसतात आनी दरेकाक वेवसाय मेळटा अशें खंवटे हांणी सांगलें. आगोंद दर्यादेगेक संवसारभर नामना मेळ्ळ्या आनी ती नामना आनी ताचो दर्जो कायम दवरपा खातीर सगल्यांच्या सहकार्याची गरज तांणी उक्तायली.
ह्या वेळार उलयतना सभापती रमेश तवडकार हांणी सांगलें, व्हिजन 2030 खाला कोणकोणचो विकास सादपाचो आसून ते नदरेन भेटीचें आयोजन केलां. काणकोण हो सैम संपन्न म्हाल आसा आनी पर्यटक व्हड प्रमाणांत आकर्शीत जाल्यार काणकोणच्या विकासांत ताची भर पडटली अशें तवडकार हांणी म्हणलें.
ह्या वेळार नगराध्यक्ष रमाकांत नायक गांवकार, नगरसेवक सायमन रेबेलो, हेमंत नायक गांवकार, दिवाकर पागी, सरपंच फातिमा रोड्रिगीश, सुनील पैंगीणकार, सचीन नायक, आनंदु देसाय, गणेश गांवकार, सर्वानंद भगत, विशांत गांवकार, रामनाथ वेळीप, निलेश पागी, प्रभाकर गांवकगर हांणी वेगळ्योवेगळ्यो सुचोवण्यो मांडल्यो.
ह्या वेळार उपनगराध्यक्ष लक्ष्मण पागी, भाजपा मंडळ अध्यक्ष विशाल देसाय, महेश नायक, संजीव तिळवे, सिद्धार्थ देसाय, चंद्रकांत सुधीर, चंदा देसाय, सविता तवडकार, सगल्या पंचायतीचे सरपंच, पंच, नगरसेवक हाजीर आशिल्ले.
संचालक निखील देसाय हांणी पर्यटन वाडोवपा खातीर सगले तरेच्यो उपाय येवजण्यो राबयतले अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
