भांगरभूंय | प्रतिनिधी
भारताच्या एचएस प्रणॉयाक बीडब्ल्यूएफ वर्ल्ड टूर बॅडमिंटन फायनल्साच्या अ गटांतले दुसरे मॅचींत चीनाच्या लु गुआंग जू कडल्यान तीन गेमींनी हार घेवची पडली. हे हारीक लागून प्रणॉयाचें सेमी फायनलींत सुवात मेळोवपाचें आव्हान लागींलागीं सोंपिल्ल्यांत जमा आसा.
84 मिनटां मेरेन चलिल्ल्या संघर्शांत प्रणॉयाक 21-23, 21-17 आनी 19-21 अशा तीन गेमींनी हार घेवची पडली. दोनूय खेळगडे एकामेका आड दुसरे खेपे खेळ्ळे. हाचे आदीं फ्रॅंच ओपनांत ते एकामेका आड खेळिल्ले. त्या वेळारूय प्रणॉयाक हार घेवची पडिल्ली. बुधवारा जाल्ले पयले मॅचींत प्रणॉयाक जपानाच्या कोडाई नाराओका आड लेगीत हार घेवची पडिल्ली.
प्रणॉय आयज आपली तिसरी मॅच संवसारीक क्रमवारींत पयले सुवातेर आशिल्ल्या आनी ऑलिम्पीक चॅम्पियन विक्टर एक्सेलसना आड खेळटलो.
सुरवातीच्यो दोनूय मॅच हारिल्ल्यान प्रणॉयाची सेमी फायनलींत पावपाची आस्त सोंपिल्ल्यांत जमा आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
