भांगरभूंय | प्रतिनिधी
भारताचो युवा ग्रॅण्डमास्टर आर प्रज्ञानंदान एफटीएक्स क्रिप्टो करंड बुद्दीबळ सर्तींतली जैताची धांव कायम राखतना चवथे फेरयेंत बळिश्ट अमेरिकेच्या लॅव्हॉन अॅरोनियनाक लेगीत हारयलो.
17 वर्सां पिरायेच्या प्रज्ञानंदान पयल्या तीन फेरयांनी वळेरेन अलिरेझा फिरौझा, अनीश गिरी आनी हान्स निमन हांकां हारयिल्ले.
प्रज्ञानंदान अॅरोनियनाक 3-1 फरकान हारयलो. ह्या जैता उपरांत प्रज्ञानंद संवसारीक वस्ताद मॅग्नस कार्लसना वांगडा जोड रितीन पयले सुवातेर आसा. दोगांयचे दरेकी 12 गूण जाल्यात.
ते पयलीं जाल्ले तिसरे फेरयेंत ताणें अमेरिकेच्या हान्स निमनाक 2.5-1.5 अशा फरकान हारयलो.
मजगतीं, कार्लसनान तिसरे फेरयेंत अमेरिकेच्या अणभवी लॅव्हॉन अॅरोनियनाक 2.5-1.5 असा हारयलो. निमना आडचे मॅचींत प्रज्ञानंदाक सुरवातीक सर्वोत्तम खेळ करपाक जमूंक ना. ताणें लडतींतलो पयलो डाव वगडायलो. पूण, उपरांत पुनरागमन करतना प्रज्ञानंदान दुसऱ्या आनी चवथ्या डावांनी जैत जोडलें. तिसरो डाव बादाबाद उरलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
