भांगरभूंय | प्रतिनिधी
5,038 उमेदवार रिंगणांत, 1,517 मतदान केंद्रां, 45 संवेदनशील
भांगरभूंय I प्रतिनिधी
पणजी : गोंयांतल्या 186 पंचायतीं खातीरचो जाहीर प्रचार सोमारा सांजे सोंपलो. फाल्यां 10 ऑगस्टाक मतदान जातलें. वेंचणुकेंत दादल्यां परस बायलां मतदारांचो आंकडो चड आसा. राज्य वेंचणूक आयोगान वट्ट 45 मतदान केंद्रां संवेदनशील जाहीर केल्यात. तशेंच सगल्या पंचायतींनी मेळून फक्त एका तृतीयपंथी मतदाराची नोंद जाल्या. तो तिसवाडी म्हालांतलो आसा.
शुक्रारा 12 ऑगस्टाक मतमेजणी जातली. मतमेजणी म्हालाच्या मध्यवर्ती सुवातेर जातली. मतमेजणेची थळां आयोगान जाहीर केल्यात. मतदानाची तयारी सुरू जाल्या. मतदान केंद्रांची तपासणी करपा सयत मतदानाचें सामान पावोवपाचें काम सुरू आसा. मतपत्रिकेच्या आदारान मतदान जातलें. पंचायत वेंचणूक पक्षीय पांवड्यार जावची ना, तरी लेगीत राजकी पक्षांचे कार्यकर्ते व्हडा संख्येन वेंचणूक रिंगणांत आसा. आमदार तशेंच मंत्र्यांनी पंचायत वेंचणुकेच्या उमेदवारांचो प्रचार केलो. मुख्यमंत्री डॉ. प्रमोद सावंत, भलायकी मंत्री विश्वजीत राणे, आमदार डॉ. चंद्रकांत शेटये, वीज मंत्री सुदिन ढवळीकार, कला आनी संस्कृती खात्याचे मंत्री गोविंद गावडे, आमदार प्रवीण आर्लेकार, जीत आरोलकार हांणी सगल्यांनी समर्थक उमेदवारांचो प्रचार केलाे. जाहीर प्रचार सोंपलो तरी सोशल मिडिया (व्हाॅट्सअॅप, फेसबूक) संदेशा वरवीं मतदारां कडेन संपर्क सादप सुरू आसा.
दक्षीणे परस उत्तर
गोंयांत चड पंचायती
दक्षीण गोंयां परस उत्तर गोंयांत चड पंचायतींनी मतदान जातलें. उत्तर गोंयांत 97 पंचायतींनी जाल्यार दक्षीण गोंयांत 89 पंचायतींनी वेंचणूक जाता. उत्तर गोंयांतल्या 97 पंचायतींनी 742 प्रभाग आसा, जाल्यार 3 लाख 85 हजार 867 मतदार आसा. उत्तर गोंयांत 2,667 उमेदवार रिंगणांत आसात. हातूंतले 41 बिनविरोध वेंचून आयल्यात. उत्तर गोंयांत लेगीत दादल्यां परस बायलां मतदारांचो आंकडो चड आसा. 1 लाख 87 हजार 791 दादले मतदार आसात जाल्यार 1 लाख 98 हजार 75 बायलां मतदार आसात. उत्तर गोंयांत 765 मतदान केंद्रां आसात.
दक्षीण गोंयांत 89 पंचायतींनी 722 प्रभागां खातीर वेंचणूक जातली. दक्षीण गोंयांत बायलां मतदारांचो आंकडो 2 लाख 11 हजार 943 आसा जाल्यार दादले मतदारांचो आंकडो 1 लाख 99 हजार 210 आसा. 752 मतदान केंद्रांतल्यान 18 केंद्रां संवेदनशील आसात. 2,371 उमेदवारांतल्यान 23 उमेदवार बिनविरोध वेंचून आयल्यात.
उत्तर गोंयांत पेडणें, सत्तरी, दिवचल, बार्देस आनी तिसवाडी म्हालांचो आस्पाव जाता. दक्षीण गोंयांत फोंडें, साश्ट, सांगें, धारबांदोडें, काणकोण, केपें आनी मुरगांव म्हालांचो आस्पाव आसा.
राज्यांत 186 पंचायतींनी 1464 प्रभाग
दादल्यां परस बायलां मतदारांचो आंकडो चड
फकत एक तृतीयपंथी मतदार
64 उमेदवार विरोधाविणें आयलें वेंचून
वट्ट 1,517 मतदान केंद्रांतल्यान 45 मतदान केंद्रां संवेदनशील
पुराय गोंयांत 7 लाख 97 हजार 20 मतदार
3 लाख 87 हजार दादले मतदार
4 लाख 10 हजार 18 बायलां मतदार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
