भांगरभूंय | प्रतिनिधी
प्रक्रिये उपरांत गोंयांतूच जाता तिपेटीन दरान तांदळाची विक्री
भांगरभूंय I नारायण गांवस
पणजी : गोंयांत जावपी भात पिकाचेर प्रक्रिया करपाक लघू उद्देग नाशिल्ल्यान भाताची निर्यात करची पडटा. हाचो फटको शेतकारांक तशेंच थळाव्या गिरायकांक बसता. राज्यांत वर्सुकीं 20 हजार टन गांवठी भाताचें उत्पादन जाता. हातूंतले 90 टक्के म्हणल्यार 18 हजार टन भाताची कर्नाटक, केरळ ह्या राज्यांनी निर्यात जाता.
गोंयांत जया, ज्योती, कर्जत ह्या गांवठी भाताक मोटी मागणी आसा. भोवतेक हॉटेल्सांनी तशेंच घरांनी गांवठी भाताक मागणी आसता. पूण गोंयकारांक दुकाना वयल्यान 50 ते 80 रुपया प्रती कील दरान गांवठी तांदूळ खरेदी करचे पडटात. शेतकारां कडल्यान हें भात 18 रुपया प्रती कील दरान कृशी सहकारी सोसायट्यो खरेदी करतात. ताचेर 2 रुपयांचें अनुदान कृशी खात्या कडल्यान शेतकारांक मेळटा.
सहकारी सोसायट्या कडल्यान दुसऱ्या राज्यांतले एजंट 23 ते 25 रुपया प्रती कील दरान भाताची खरेदी करतात. होच तांदूळ प्रक्रिये उपरांत गोंयांत तिपेटीन दरान विकतात.
लघू उद्देगाक लागून शेतकारांक फायदो
आमी शेतकारांक चडांत चड फायदो मेळोवन दिवपाक तांचे कडल्यान प्रती कील 22 रुपया प्रमाण भात विकत घेतात. दुसऱ्या राज्यांतले एजंट शेतकारी सहकारी सोसायट्यां कडल्यान उण्या दरांत भात खरेदी करतात. ताका लागून शेतकारांक चड हमीभाव दिवपाक सोसायट्यांक शक्य जायना. गोंयांत हो प्रकल्प जालो, जाल्यार ताचो फायदो सगल्यांकूच जातलो. ते खातीर राज्यांतल्या सगल्या सोसायट्यांनी प्रस्ताव मांडला. तो मंजूर जाला, अशें कृशी समृद्धी फार्मर सोसायटीचे सचीव शेखर कांदोळकार हांणी सांगलें.
लाडफें – दिवचले उबारतले लघू उद्देग
भाताचेर प्रक्रिया करपाक गरजेचो आशिल्लो लघू उद्देगाचो प्रस्ताव सरकारा कडेन मांडला. तो मंजूर लेगीत जाला. केंद्र सरकाराच्या ‘स्फूर्ती’ येवजणे खाला लाडफे-दिवचले खादी ग्रामोद्योग विभागा वरवीं हो लघू प्रकल्प उबारतले. ह्या प्रकल्पांत शेतकारांनी उत्पादन घेतिल्ल्या भाताचेर प्रक्रिया जातली. ताचो थेट फायदो शेतकारांक मेळटलो. ह्या प्रकल्पा खाला तांदूळ, रवो, चिरमुले, फाव अशा स्वरूपांत भाताचेर गोंयातूच प्रक्रिया करतले, अशें ‘आत्मा’चे कृशी अधिकारी किशोर भावे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
