भांगरभूंय | प्रतिनिधी
हायकोर्टाचो निवाडो
पणजी, प्रतिनिधी : गोंयांत पोरूं २८ डिसेंबराक ‘सनबर्न’ इलेक्ट्रॉनीक नाच, संगीत महोत्सव आयोजीत करपाची परवानगी दिल्ली. ती बेकादेशीर आशिल्ल्याचो निवाडो मुंबय उच्च न्यायालयाच्या गोंय खंडपीठान दिलो. तशेंच फुडाराक अशे तरेच्या महोत्सवांक परवानगी दिवपाक अधिकाऱ्यांचो जोड विशेश विभाग स्थापन करून परवानगी दिवपाचो आदेश खंडपीठान दिलो. हे विशींचो निवाडो न्या. महेश सोनक आनी न्या. भारत देशपांडे ह्या दोन वांगड्यांच्या खंडपीठान दिला.
ह्या प्रकरणांत रमेश सिनारी हांणी जनहित याचिका दाखल करून ‘सनबर्न’च्या आयोजकांनी आवाज प्रदुशणाचे नेम मोडिलल्याचो दावो केलो. तांणी राज्य सरकार, पर्यटन संचालक, उत्तर गोंय जिल्होधिकारी, उपजिल्होधिकारी, प्रदूशण नियंत्रण मंडळाचे वांगडी सचीव, उपविभागीय पुलीस अधिकारी, हणजूण पुलीस निरीक्षक आनी स्पेसबाउंड वेब लॅब प्रा. लि. हांकां प्रतिवादी केल्ले.
वागातोर सनबर्न महोत्सव जावपाची म्हायती मेळ्ळ्या उपरांत याचिकादारान संबंदी यंत्रणा कडेन पत्रवेव्हार केलो. तातूंत तांणी सरकारी मान्यताय आनी संबंदीत यंत्रणांची परवानगी आनी सुरक्षा यंत्रणेची दखल घेनासतना ‘सनबर्न’ इलेक्ट्रॉनिक डान्स म्युझीक महोत्सव आयोजीत करपाक, संगीत वाजोवपाची परवानगी दिल्ल्याचो दावो केला. तशेंच महोत्सव वाठारांत आवाजाची खरसाण मेजपाचीं यंत्रणां ना असोय दावो तांणी केला. हाची दखल घेवन खंडपीठान यंत्रणां उबारपाक सांगलें.
कांय कडेन आवाज ५५ डेसिबल्स परस चड आशिल्ल्याचे कळिल्लें. उपरांत खंडपीठान बार्देसच्या जिल्होदंडाधिकार्याक प्रतिज्ञापत्र दाखल करपाक सांगिल्लें. हातूंत तांणी सगळ्या यंत्रणांची परवानगी घेतली आनी उपरांत २८ डिसेंबर २०२२ क परवानगी दिल्ल्याची म्हायती दिली. ही परवानगी बेकायदेशीर आशिल्ल्याचो निवाडो खंडपीठान दिला.
फुडाराक असल्या महोत्सवाक परवानगी दिवपा खातीर जोड विशेश विभाग स्थापन करून परवानगेचो प्रस्न सोडोवपाक सांगलें. तशेंच अश्या महोत्सवा वेळार पुलीस आनी प्रदुशण मंडळाचे वरिश्ठ अधिकारी, तशेंच जिल्होधिकारी वा उपजिल्होधिकारी आयोजना वेळार हाजीर रावन देखरेख करपाचे आदेश दिले. तशेंच आयोजक कंपनीन याचिकादाराक २५ हजार रुपया भरपाय दिवपाचे निर्देश जारी केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
