भांगरभूंय | प्रतिनिधी
भांगरभूंय । प्रतिनिधी
पोरणे गोंयः पोरणे गोंयच्या दायज वाठारांत अस्तित्वांत नाशिल्ल्या घरांक घर नंबर दिवपाचो प्रकार मारयणा फॅर्रांव आनी जॉन मस्कारेन्हास हांणी उक्ताडार हाडल्या उपरांत रांज्यांतल्या क्रियाशील समाज वावुप्यांनी (अॅक्टिव्हिस्ट) आतां तातूंत लक्ष घातलां. पोरण्या गोंयांत घर नंबर आनी बेकायदेशीर बांदकाम सारके प्रकार जावचे न्हय म्हणून पोरण्या गोंयां खातीर जाता तितल्या बेगीत मास्टर प्लॅन तयार करपाची मागणी इतिहास अभ्यासक प्रजल साखरदांडें आनी हेर वावुरप्यांनी केल्या. जे घर नंबर दिल्यात ते रद्द करपाची मागणी तांणी पोरणे गोंय पंचायत मंडळा कडेन केल्या.
पोरण्या गोंयच्या दायज वाठारांत सध्या चार बेकायदेशीर बांदकामा आसात. पूण प्रत्यक्षांत 21 बांदकामांक घर नंबर दिल्यात अशें ग्लेन काब्राल हाणे सांगलें. पंचायत मंडळान जमीन मालमत्तेची तपासणी करून जे घर नंबर दिल्यात ते बांदकामां सुरू करचे पयलीं रद्द करपाची मागणी ताणे केल्या. पोरण्या गोंयांत जमनी घेवन त्यो सेंट फ्रान्सिस झेवियर, सेंट मायकल ह्या सारक्या संतांच्या नांवार रजिस्टर केल्यात. प्रत्यक्षांत ह्यो जमनी गोंयां भायल्यांनी घेतल्यात अशी म्हायती ताणे दिली. जमनी गोंयकारांनी घेतल्यात अशें दाखोवपा खातीर अशें केलां.म मात बक्षी आनी गुप्ता हाणी जमनी घेतल्यात अशें ताणे सांगलें. सेंट काजिटन चर्चीच्या 300 मीटर दायज वाठारांत कसलेंय बांदकाम करपाक बंदी आसा. ताका लागून घर नंबर घेवंत त्या वाठारांत पयलीं सावन बांदकामां आसात हें दाखोवन दिवपा खातीर अस्तित्वांत नाशिल्ल्या बांदकामांचे घर नंबर घेतल्यात असो आरोप काब्राल हाणे केला.
पोरण्या जमनी विकत घेतिल्ल्यानी युनेस्कोच्या नेमांचें सर्रास उल्लंघन चलयलां हे खातीर प्रजल साखरदांडेन हुस्को उक्तायला. बक्षी आनी गुप्ता दायज वाठारांतल्या एक किलोमीटर वाठारांत बांदकाम बंदी नेमाक कुशीक वडोवन बांदकामां करतात अशें ताणे सांगलें. सध्या सेंट काजिटन चर्च वाठारांत जे तरेन एक बेकादेशीर बंगल्याचें बांदकाम चल्लां तशीच बांदकाम घन नंबर घेवन करपाची शक्यताय आसा. हे प्रकार जावचे न्हय हे खातीर पोरण्या गोंयां खातीर मास्टर प्लॅन करपाची गरज साखरदांडेन उक्यायल्या. गोंय गुंतवणूक म्हामंडळान पोरणे गोंय वाठारांत इको- टुरिझम प्रकल्पाक मान्यताय दिला. तशेंच आनी प्रकल्प हाडपाचे यत्न चल्ल्यात अशें दिसता अशे ताणे सांगलें.
घर नंबर दिवपाक पोरणे गोंय पंचायत मंडळ घुस्पलां असो आरोप शंकर पोळजी हाणे केला. साबार लोकांक घर नंबर जाय जाल्यार कितलीशींच कागदपत्रां सादर करचीं पडटात. मात ह्या प्रकारांत अस्तित्वांत नाशिल्ल्या बांदकामांक घर नंबर खंयच्या आदारार दिल्यात, असो प्रस्न ताणे केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
