भांगरभूंय | प्रतिनिधी
पणजी: पोरणें गोंया दर्ग्या कुशीक बुधवारा सांजवेळा बस आनी दुचाकी मदीं जाल्ल्या अपघातांत कुंडयची संतोषी नायक (27) ही तरणाटी गंभीर जखमी जाली. तिचेर बांबोळे गोंय वैजकी म्हाविद्यालयाच्या अतिदक्षता विभागांत उपचार सुरू आसात. ह्या प्रकरणांत पोरणें गोंय पुलिसांनी मोटार वाहन अपघाताची नोंद केल्या.
पोरणें गोंय पुलिसांनी दिल्ले म्हायती प्रमाण बुधवारा सांजवेळा स वरांचेर दर्ग्या कुशीक बस आनी दुचाकीचो अपघात जाल्ल्याची म्हायती पुलीस नियंत्रण कक्षान पोरणें गोंय पुलिसांक तशेंच 108 अॅम्बुलन्सीच्या नियंत्रण कक्षाक दिली. ते प्रमाण अपघातांत गंभीर जखमी जाल्ली दुचाकी चालक संतोषी नायक हिका 108 अॅम्बुलन्सीन बांबोळे व्हेली. उपरांत कॅज्युलटी विभागांत तिचेर मुळावे उपचार करून तिची स्थिती गंभीर आशिल्ल्यान तिका अतिदक्षता विभागांत दाखल केल्या.
मजगतीं, अपघाताची म्हायती मेळटकूच पुलीस निरिक्षक सतीश पाडवळकार हांच्या मार्गदर्शना खाला पुलीस उपनिरिक्षक सुदिन रेडकार हांच्या फुडारपणा खाला पुलीस हवालदार संतोष जाधव हांणी हेर कर्मचाऱ्यां सयत अपघात थळार धांव घेतली. उपरांत पुलिसांनी अपघाताचो पंचनामो करून दोनूय वाहनां कुशीक काडलीं.
मेळिल्ले म्हायती प्रमाण बस पणजी सावन फोंड्यां वताली. जाल्यार बशीचे मुखार तेच दिशेन संतोषी नायक दुचाकी घेवन कुंडय आपल्या घरा वताली. पोरणें गोंया दर्ग्या कुशीक पावतकूच अचकीत अपघात जाल्ल्याची म्हायती थळाव्यांनी दिली. ह्या प्रकरणांत पोरणें गोंय पुलिसांनी मोटार वाहन अपघाताची नोंद केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.