भांगरभूंय | प्रतिनिधी
पणजीः सेव्ह ओल्ड गोवा अॅक्शन कमिटी हे समाज वावुरपी संघटणेन पोरणें गोंया नवें पुलीस स्टेशनाक विरोध केला. ह्या पुलीस स्टेशनाचें बांदकाम बफर झोना भितर येता आनी पोरणे गोंय दायज थळांच्या नेमांचें उल्लंघन जाता, असो आरोप संघटणेन केला.
सेव्ह ओल्ड गोवा अॅक्शन कमिटीच्या वांगड्यांनी आझाद मैदानाचेर हे विशीं पत्रकार परिशद घेतली. हे विशीं उलयतना संघटणेची वांगडी फातिमा परेरा हांणी सांगलें, पोरणें गोंया येवपी तीन माळ्यांच्या नव्या पुलीस स्टेशनाच्या बांदकामाक आमी आक्षेप घेवन हे विशींचें निवेदन संबंदीत खात्यांक धाडलां.
हो प्रस्तावीत प्रकल्प संवसारीक दायज आनी पुरातन थळाच्या बफर झोना भितर येता आनी भारतीय पुरात्तत्व सर्व्हेक्षणाच्या नेमा प्रमाण बफर झोना भितर बांदकामाक परवानगी नात. पुलीस हे कायद्याचे रक्षक आसात देखून तांणी भारतीय पुरातत्व सर्व्हेक्षण कायद्याचे नेम पाळून दायज थळांची राखण करची, अशी तांच्या कडल्यान अपेक्षा आसा, अशें परेरा हांणी सांगलें.
हें पुलीस स्टेशन कार्यरत जालें जाल्यार येरादारी व्हड प्रमाणांत वाडटली आनी हाका लागून येरादारीची कोंयडी जावन दायज आनी पुरातत्व थळांचेर वायट परिणाम दिसून येतले. ह्या पुलीस स्टेशन खातीर आदले मुख्यमंत्री मनोहर पर्रीकार आनी कुमारजुंवेंचे आदले आमदार पांडुरंग मडकयकार हांणी पुलीस स्टेशना खातीर योग्य अशी सुवात सोदिल्ली. हें पुलीस स्टेशन प्रस्तावीत सुवातेर व्हरचें, अशी मागणी परेरा हांणी केल्या. ते भायर पोरणें गोंय पुलीस स्टेशनाचे कार्यकक्षेंत सांताक्रुझ आनी कुमारजुंवें मतदारसंघ येतात. ते खातीर दोनूय मतदारसंघां मदीं अशी बरी सुवात सोदून हें पुलीस स्टेशन बांदचें आनी आमचें गिरेस्त दायज, प्रतिबंधीत आनी पुरातत्व थळांची राखण करची, अशी सुचोवणी परेरा हांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
