भांगरभूंय | प्रतिनिधी
पणजी, प्रतिनिधी : बार्देस म्हालांतल्या १७ वर्सां पिरायेचे चलयेक २०२० त पळोवन व्हरून तिचेर बलात्कार केल्ल्या प्रकरणांत पुरावे नाशिल्ल्यान औरेलिओ डिसा हाका जलदगती आनी पॉक्सो न्यायालयान मुक्त केलो. न्यायाधीश दुर्गा मडकयकार हांणी तसो आदेश जारी केलो.
न्या. दुर्गा मडकयकार हांणी डिसा हाचे आड पुरावे नाशिल्ल्यान निरीक्षण नोंद करून ताची सुटका करपाचो आदेश दिलो.
मजगतीं, चलयेचे आवयन ७ ऑगस्ट २०२० दिसा म्हापशें पुलीस स्टेशनाचेर बलात्काराची कागाळ केल्ली. ते प्रमाण तेन्नाची उपनिरीक्षक विभा वळवयकार हांणी दुबाविता आड गुन्यांव नोंद केल्लो. उपरांत, २२ ऑगस्टाक पुलिसांनी चलयेची सुटका करून दुबाविताक अटक केल्ली. मागीर डिसा हाणें जिल्हो आनी सत्र न्यायालयांत जामीन अर्ज दाखल केल्लो. तो २३ ऑक्टोबराक भायर मारिल्लो. उपरांत दुबावितान मुंबय उच्च न्यायालयाच्या गोंय खंडपीठांत जामीन अर्ज दाखल केल्लो. खंडपीठान २२ डिसेंबर २०२० दिसा ताका २५ हजार रुपयांची हमी आनी हेर अटींचेर जामीन मंजूर केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
