भांगरभूंय | प्रतिनिधी
-राज्यभर मुस्लिमां कडल्यान निशेध, दुबावीताचे अटकेची मागणी
पणजी : गोंय राज्यांत मुहंमद पैगंबर हांची जयंती (ईद ए मिलाद उन नबी) व्हडा उमेदीन मनयली. मात, कांय दुस्वासी लोकांनी ह्या उत्सवाक खत लावपाचो यत्न केलो. मेळिल्ले म्हायती प्रमाण, फोंडें शारांत ईदाचेर प्रतिक्रिया दिवपी व्हिडियोचेर एकल्यान इन्स्टाग्रामा वयले बोगस आयडी वयल्यान पैगंबर आनी इस्लामा विशीं वायट उतरां बरोवन मुस्लीम धर्मियांच्यो भावना दुखोवपाचो यत्न केलो. ताका लागून शुक्रार, शेनवारा राज्यभरांत निशेध जालो. पणजी, मडगांव, म्हापशें, फोंडें हांगा शेंकड्यांनी मुस्लिमांनी पुलीस स्टेशना भायर गर्दी करून दोशी व्यक्तीक अटक करपाची मागणी केली. दनपरां, पुलिसांनी तांची समजूत काडून तांकां घरा वचपाक सांगलें.
ह्या प्रकारा आड म्हापशें, मडगांव, फोंडें, कुडचडें, मायणा- कुडटरी, फातोड्डें हांगा पुलीस कागाळी दाखल जाल्यात. धर्मीक भावना दुखायिल्ले खातीर मुस्लिमांच्या आठ जमातीं (संघटना) कडल्यान अज्ञाता आड म्हापशें पुलिशेंत कागाळ दाखल जाल्या. दुबाविताक अटक करपाचें आस्वासन दियत सगल्या मुस्लीम भावांनी शांतताय बाळगुची, असो उलो पुलीस निरिक्षक सीताकांत नायक हांणी मारला.
ह्या प्रकरणांत कांय व्हिडियो सोशल मिडियाचेर व्हायरल जाल्यात. तातूंत साबार जाग्यांचेर मुस्लीम भाव ह्या बदनामीच्या प्रकाराचो निशेध करतना दिसतात. देवाचो अपमान करपी दोशी व्यक्तीक बेगोबेग अटक करचो आनी ताका कायद्यान खर ख्यास्त दिवची, अशी मागणी तांणी केल्या. फाटल्या 40 वर्सांत म्हाका असलो प्रकार केन्नाच जाल्लो दिसूंक ना. आमी हांगा शिवजयंती, चवथ, ईद, ख्रिसमस एकठांय मनयतात. एकामेकांच्या घरांनी वतात. सणा- परबांक एकमेकांक खाणां भेट दितात. मात फाटल्या कांय वर्सांनी वातावरण इबाडपाचो यत्न कांय समाज विद्वाट्या कडल्यान जावपाक लागला. सरकारान हाची दखल घेवन दोशींचेर खर कारवाय करची, अशी मागणी एक मुस्लीम फुडारी व्हिडियोंत करतना दिसता. ह्या आंदोलनांत क्रिस्तांव आनी हिंदू भावांनीय प्रतिक्रिया दिवन एकूण ह्या बदनामीच्या प्रकरणाचो निशेध केला. पुलीस दोशीक सोदून काडटले, तेन्ना लोकांनी शांतीकाय बाळगुची, अशें आवाहन तांणी केलां.
हे विशीं एका तरणाट्यान प्रतिक्रिया दितना सांगलें कीं, हालींच्या कांय वर्सांनी हें सुरू जालां. कांय लोक अल्पसंख्यांकां आड तर थोडे भोवसंख्य हिंदूं आड नाका जाल्ले कमेंट सोशल मिडियाचेर घालतना दिसतात. पयरचो मजकूर इन्स्टाग्रामा वयल्या Find me if you can ह्या अकावंटा वयल्यान अपलोड केला. सध्या त्या धर्मदुस्वासी मनशान तो अकावंट बंद केला. ही व्यक्ती गोंयकार आसा. ती कोंकणी भाशेंत हे पोस्ट करता. ताका रोखडीच अटक जातली, अशें पुलिसांनी सांगलें. लोकां मदीं फूट घालपाची प्रवृत्ती आशिल्लो हो मनीस ह्या अकावंटा वयल्यान कुराण, मुहंमद पैगंबर, खुरीस, ख्रिश्चन हांचे आड सातत्यान पोस्ट घालीत आसता, अशें एका तरणाट्यान सांगलें.
वाळपय पुलिसांनी केली तरणाट्याक अटक
मुस्लीम धर्मा आड आक्षेपार्ह विधान सोशल मिडियाचेर व्हायरल केल्ले प्रकरणांत वाळपय पुलिसांनी मोसोड्डेंच्या किशन नायक ह्या तरणाट्याक अटक केली. वाळपय पुलीस स्टेशनाचेर मस्लिम संघटणेन आक्षेपार्ह विधान सोशल मिडियाचेर व्हायरल केल्ल्या दुबाविताक अटक करपा खातीर आंदोलन केल्ले. ह्या वेळार व्हड संख्येन लोक हजर आशिल्ले. वाळपयचे पुलीस निरिक्षक दिनेश गडकार हांणी हे विशीं तपास केले उपरांत किशन नायक (मासोड्डें) ह्या तरणाट्याक अटक केलो. ते उपरांत ताची जामिनाचेर सुटका केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
