भांगरभूंय | प्रतिनिधी
रमेश तवडकार: देशभरांतले विवीध कलाकार जातले वांटेकार
पणजी: पैंगीण काणकोणां 7 ते 11 डिसेंबर अशें पांच दीस लोकोत्सव मनोवपाचे आसात. हातूंत देशभरांतले विवीध कलाकार वांटेकार जातले. गोंयची ग्रामीण संस्कृती देशभरांत पावोवपा खातीर आमी फाटलीं 22 वर्सां हो महोत्सव आयोजीत करतात अशें आदर्श युवा संघाचे अध्यक्ष आनी सभापती रमेश तवडकार हांणी काल (मंगळारा) पत्रकार परिशदेंत सांगलें. ह्या वेळार तांचे सयत संघाचे सचीव बाबुसो गांवकार, भांडारी दामोदर घाडी हाजीर आशिल्ले.
आदर्श युवा संघ फाटलीं 22 वर्सां लोकोत्सव मनयतात. ह्या लोकोत्सवाच्या माध्यमांतल्यान आमी गोंयची ग्रामीण कला, लोकसंस्कृती देशभरांत पावोवपाचें काम करतात. 1995 सावन ह्या महोत्सवाची सुरवात जाल्या. ह्या वर्सा 2 लाख परस चड लोकांची ह्या पांच दिसांत हाजेरी लागपाची शक्यताय आसा. हातूंत गोंयच्या कलाकारां बरोबर देशभरांतल्यान विवीध राज्यांतल्यान कलाकार येतले. ह्या महोत्सवांत 500 स्टॉल लागपाचे आसात. ह्या स्टॉलांचेर विवीध गोंयकार संस्कृतीचें दर्शन घडटलें अशें तवडकार हांणी सांगलें.
ह्या महोत्सवांत शालेय विद्यार्थी वांटेकार जातले. ह्या महोत्सवांत येवप्यां खातीर खाशेली येरादारीची वेवस्था केल्या. महोत्सवाक केंद्र सरकाराचें तशेंच राज्य सरकाराचें अर्थीक सहकार्य मेळ्ळां. अशा लोकोत्सवांतल्यान लोकसंस्कृतीचो सांबाळ करूंक जाय अशें तवडकार हांणी म्हणलें.
आदर्श युवा संघ फाटलीं 22 वर्सा खूबशे समाजीक कार्य करीत आसात. ह्या संघा वतीन आमी फुडारी घडयतात. तशेंच शेतकारां खातीर विवीध येवजण्यो राबयतात. आतां रोखडेंच कृशी आधारीत व्हड प्रकल्प घालपाचो विचार आसा. तशेंच आमी ग्रामीण संस्कृती संवसारभर पावोवपाचें काम करीत आसात अशें रमेश तवडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
