भांगरभूंय | प्रतिनिधी
लवलेश च्यारीक न्याय मेळा मेरेन पेप्सीचें उत्पादन आडावपाचो निर्णय
भांगरभूंय । प्रतिनिधी
सांगें: दाबामळ कोटाली सांग्यार 19 ऑक्टोबराक मुख्य रस्त्याचेर पेप्सी कंपनीच्या ट्रकापोंदां चिड्डून लवलेश मनोहर च्यारी हाका मरण आयिल्लें. ताका लागून कोटाली सांग्यार 20 ऑक्टोबराक सकाळ सावन तणाव निर्माण जाल्लो. भिरांकूळ अपघात जावन लेगीत पेप्सी कंपनीन 19 ऑक्टोबराक आपलें उत्पादन आनी येरादारी चालूच दवरिल्ल्यान खुबळिल्ल्या लोकांनी रस्तो आडावन तिडक उक्तायली.
फाटल्या स वर्सां सावन ही कंपनी चालू आसा, पूण तिचो थळाव्या वा सांगेंच्या लोकांक कसलोच फायदो ना. हे कंपनींत 300 परस अदीक कामगार आसात. तातूंत फक्त 50 टक्के सांगेंचे जरी आसले तरीय तातूंतले फक्त 16 कामगार कायम आसात, ते लेगीत उण्या पगाराचेर. रस्तो अशीर आसा, तरी लेगीत खारजाच्या आर्का वयल्यान 10 टायरांच्यो गाडयो येरादारी करतात. लोकांक मातूय सुसेग दिनात. इतले दीस लोक सोंसून राविल्ले, पूण 19 ऑक्टोबराचे घडणुकेन कंपनीन लोकांक रस्त्याचेर देंवपाक लायले, अशें थळावे लोकांचें म्हणणें आसा.
बिरेस्तारा सकाळीं 8 वरां सावन लोकांनी ‘रास्ता रोको’ केलें. ह्या वेळार मंत्री सुभाष शिरोडकार आनी मंत्री सुभाष फळदेसाय हांणी भेट दिली. उपरांत मंत्री फळदेसया हांणी फुडाकार घेवन दनपारां जिल्होधिकारी, संयुक्त मामलेदार, पुलीस निरिक्षक, सरपंच, पेप्सीचे अधिकारी, अलबायस अधिकारी हांचे वांगडा बसका घेतली.
मरण आयिल्ल्या लवलेशाची आवय फुलां विकून संवसाराक हातभार लायता. भाव बेरोजगार आसा. घराचो भार लवलेशाचेर आशिल्लो. पूण लवलेश गेल्ल्यान घराचेर व्हड संकश्ट आयलां. कंपनी कडल्यान लवलेशाच्या कुटुंबाक पयशांचो आदार आनी ताच्या भावाक कायम नोकरी दिना ते मेरेन कंपनी बंद दवरपाचें, अशें बसकेंत थारलें. थळाव्या लोकांच्या ह्या निर्णयाक मंत्री फळदेसाय हांणी मंजुरी दिली. लोकांनी पेप्सी कंपनीक पांच दिसांचो वेळ दिला. पांच दिसां भितर हाचेर निर्णय घेतलो नाजाल्यार पांच दिसांनी आनीक एक बसका घेवन फुजली रणनिती थारायतले, अशें थळाव्या लोकांनी सांगलें.
आपूण सदांच लोकां वांगडाः सुभाष फळदेसाय
सांग्यार एका तरणाट्याच्या मरणान दुख्खाचें वातावरण पातळ्ळां. त्या तरणाट्याच्या घरच्यांक मजत करून ताच्या भावाक कायम नोकरी दिवची. तांकां न्याय मेळोवन दिवपाक आपलोय तेंक आसतलो. जे मरेन लवलेशाच्या कुटुंबाक न्याय मेळना ते मेरेन कंपनीक उत्पादन चालू दवरपाक दिवचे नात. आपूण सदांच लोकां वांगडा आसतलों, अशें मंत्री सुभाष फळदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
