भांगरभूंय | प्रतिनिधी
म्हापशें: पेडें म्हापश्यां मोटारीन दुचाकीक धपको दिल्ल्यान जाल्ल्या अपघातांत दोग दुचाकी चालक गंभीर जखमी जाले. मोटारीचो टायर फुटिल्ल्यान दुबावीत चालकान अपघाता उपरांत मोटार घडणूक थळार उडोवन पळ काडलो, दुबावीत सोऱ्याचे घुंवळेंत मोटार चलयतालो असो दुबाव पुलिसांनी उक्तायला.
ह्या अपघातात दुचाकी चालक मोंतू प्रधान (24) आनी जोगिंदर शाहू (20) हे जखमी जाल्यात. ते सद्या कोलवाळे रावतात पूण मूळ ओडिशांतले आसात. तांचेर गोमॅकाँत उपचार सुरू आसात. जाल्यार मॉरिसन जोजफ मार्टिन्स (रा. जोजफवाडो, कुचेली) अशें दुबावीत मोटार चालकाचें नांव आसा. ताची सोरो पियेला काय ना हाची चांचणी म्हापशें पुलिसांनी घेतल्या.
हो अपघात आयतारा मध्यान रातीं 12.30 वरांच्या सुमाराक पेडें हांगासरले मंदार गॅरेजी कुशीक घडलो. जखमी दुचाकी चालक एमपी 09 एमटी 0748 ह्या क्रमांकाचे मोटारसायकली वेल्यान पेडें जंक्शना वेल्यान जिल्हो हॉस्पिटलाचे दिशेन वताले जाल्यार ताचे विरुद्ध दिशेन दुबावीत जीए 03 पी 3651 क्रमांकाचे मोटारीन वतालो. वाटेर मंदार गॅरेजी कुशीक खुरसा कडेन मोटारीन चुकीचे दिशेन वचून मोटारसायकलीक नेटाचो धपको दिलो.
ह्या अपघातांत मोटारसायकली वेले दोगूय जाण रस्त्यार पडून गंभीर जखमी जाले. जाल्यार अपघात घडटकूच मोटारीचे एक रोद फुटलें. तरी लेगीत दुबावितान अदमाशेक 100 मिटराचेर गाडी व्हेली आनी जखमींक तेच स्थितींत उडोवन घडणूक थळा वेल्यान पळ काडलो.
घडणुकेची म्हायती मेळटकूच एम्बुलन्सीन जखमींक पयलीं म्हापशें जिल्हो हॉस्पिटलांत आनी उपरांत गोमॅकाँत धाडून दिले. ह्या अपघात प्रकरणांत दुबावीत मोटार चालक मॉरिसन मार्टिन्स हाचे आड भादंसंचें कलम 279, 336 आनी मोटार वाहन कायदो कलम 185, 134(अ)(ब) खाला गुन्यांव नोंद केला. फुडलो तपास पुलीस हवालदार समीर नायक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
