भांगरभूंय | प्रतिनिधी
प्रकरण दक्षता खात्या कडेन, दोशींचेर जातली कारवायः मुख्यमंत्री
भांगरभूंय I प्रतिनिधी
पणजी : नागरी पुरवण खात्याच्या राज्यभरांतल्या गुदावांत पेड्डेर जाल्ल्या 242 मेट्रीक टन तुरदाळीचें प्रकरण राज्य सरकारान चवकशे खातीर दक्षता आयोगा कडेन सोंपयलां. ह्या प्रकरणांत दोशी आसप्यांचेर कारवाय करतले, अशी हमी मुख्यमंत्री डॉ. प्रमोद सावंत हांणी दिली.
नागरी पुरवण खात्याच्या गुदावांत पडून आशिल्ली सुमार 250 मेट्रीक टन तूरदाळ पेड्डेर जाल्ल्याची बातमी छापून आयले उपरांत राज्य प्रशासन आनी सरकारांत खवदळ पडलो. बातमी प्रसिद्ध जाले उपरांत मुख्यमंत्री डॉ. प्रमोद सावंत हांचे सयत नागरी पुरवण मंत्री, खात्याचे सचीव, संचालक आनी हेर अधिकाऱ्यांनी हे प्रकरण गांभीर्यान घेतला.
शुक्रारा पणजेंत एके कार्यावळी उपरांत पत्रकारांनी हे विशीं मुख्यमंत्र्यांक विचारले, तेन्ना तांणी गुदावांत पेड्डेर जाल्ल्या तूरदाळीची चवकशी करपाचे आदेश दिल्ल्याचे सांगलें. हातूंत दोशी आसप्यांचेर निश्चीत कारवाय जातली अशें तांणी स्पश्ट केले. ते उपरांत कांय वेळांतूच नागरी पुरवण खात्याचे सचीव संजीत रॉड्रिग्स हांणी हे प्रकरण चवकशे खातीर दक्षता खात्या कडेन धाडिल्ल्याचे सांगलें.
मजगतीं, कोवीड म्हामारी काळांत जून 2020 उपरांत नागरिकांक वितरीत करपा खातीर नागरी पुरवण खात्यान नाफेड-महाराष्ट्रांतल्यान 400 मेट्रीक टन तूरदाळ 83 रुपया कील दरान गोंयांत हाडिल्ली. तातूंतली सुमार 150 मेट्रीक टन सवाय धान्य दुकानदारां वरवीं लोकां मेरेन पावयली. पूण उरिल्ल्या तूरदाळी विशीं कसलोच निर्णय जावंक नाशिल्ल्यान ही तूरदाळ सुमार दोन वर्सां राज्यांतल्या इकरा गुदावांनी पडून आशिल्ली. ते खातीर ती पेड्डेर जाल्ल्याचे मुखार आयला. हे तूरदाळीचो विलो लावपाक सरकारान निविदा जारी केल्या.
सुमार 1.75 कोटींचें लुकसाण
राज्यांत 2020त कोवीड संसर्गाचो उद्रेक जाले उपरांत थळाव्यांक तुरदाळ वितरीत करपाक नागरी पुरवण खात्यान 400 मेट्रीक टन तुरदाळ 83 रुपया कील दरान महाराष्ट्रांतल्यान हाडिल्ली. 400 मेट्रीक टन तुरदाळ सवाय धान्य दुकानदारांक वितरीत केली. उरिल्लीं तुरदाळ लेगीत सवाय धान्य दुकानदारांक दिवपाचे खात्यान यत्न केल्ले. पूण थळावे ती घेनाशिल्ल्याचो दावो करीत दुकानदारांनी ती घेवपाक न्हयकार दिलो. ते खातीर तुरदाळीचो विलो लावपाक बेगोबेग निविदा जारी केल्ली. पूण ताका प्रतिसाद मेळूंक ना. दोन वर्सां तूरदाळ गुदावांनी पडून उरले उपरांत 242 मेट्रीक टन तुरदाळ पेड्डेर जाल्ल्याचे लक्षांत अायले. हातूंत 1.75 कोटींचे लुकसाण जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
