भांगरभूंय | प्रतिनिधी
प्रकरणा कडेन थेट संबंद ना, पूण चवकशेक तयार
भांगरभूंय I प्रतिनिधी
पणजी : गुदांवांनी पेड्डेर जाल्ल्या तुरदाळ प्रकरणांत खंयचेय चवकशे खातीर आपूण तयार आसा. कोवीड म्हामारी काळांत तुरदाळ आनी साकरेची आयात करपाक सरकारान वयल्या पांवड्यार स्वतंत्र समितीची स्थापणूक केल्ली. तातूंत आपली कसलीच भुमिका नाशिल्ली. तुरदाळ पेड्डेर जाल्ल्याचें उक्तें जाले उपरांत आपणेच चवकशेचे आदेश दिल्ले, अशें स्पश्टीकरण मंत्री गोविंद गावडे हांणी शेनवारा दिलें.
राज्यांतल्या इकरा गुदांवांनी कोट्यांनी रुपयांची 242 मॅट्रीक टन तुरदाळ पेड्डेर जाल्ल्याचें उक्तें जाले उपरांत विरोधक तेन्नाचे नागरी पुरवण खात्याचे मंत्री गोविंद गावडे हांचेर खापर फोडटात. हे फाटभुंयेर आमच्या प्रतिनिधीन गावडे हांचे कडेन संपर्क सादलो, कोरोना काळांत जी तुरदाळ हाडिल्ली, ती वितरीत करपाक स्वतंत्र वयल्या पांवड्यार समितीची स्थापणूक केल्ली. 200 मॅट्रीक टना परस चड तुरदाळ हाडिल्ल्याचें कळ्ळे उपरांत ती उण्या दरान वितरकांक विकपाचो पर्याय दिल्लो. पूण तुरदाळ पेड्डेर जाल्ल्याचें लक्षांत येतकच 13 जानेवारी 2021 दिसा आपणेच चवकशेचे आदेश दिल्ले. 4 फेब्रुवारी 2021 दिसा मुख्यमंत्री डॉ. सावंत हांणीय चवकशेक परवानगी दिल्ली. ताका लागून ह्या प्रकरणा कडेन आपलो थेट संबंद येना. तरी लेगीत ह्या प्रकरणांत चवकशी जाता जाल्यार ते खातीर आपूण ताका तयार आसा. आपणा कडेन ते विशींची सगलीं कागदपत्रां आसात, अशेंय मंत्री गावडे हांणी नमूद केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
