पेडें म्हापशेंच्या इनडोर मैदानांत वाळटी

भांगरभूंय | प्रतिनिधी

देखरेख नाशिल्ल्यान 40 कोटी उदकांत गेल्ल्यांत जमा; मैदानाचो कारभार सुरक्षा रक्षकांच्या हातांत

भांगरभूंय । प्रतिनिधी

म्हापशें: पेडें म्हापशेंच्या भाऊसायब बांदोडकार खेळां संकुलांतल्या इनडोर मैदानाची योग्य देखरेख जायनाशिल्ल्यान आवतिकाय जाल्या. 40 कोटी रुपया खर्च करून उबारिल्लें हें मैदान सध्या वाळटीच्या संकश्टांत सांपडलां. वाळटी लागिल्ल्यान मैदानाचें फर्निचेर पुराय पेड्डेर जालां.

सात वर्सां आदीं राज्य सरकारान जानेवारी 2014 त जाल्ले लुसोफोनिया खेळां सर्तीं खातीर पेडें तशेंच भाऊसायब बांदोडकार खेळां संकुलांतल्या साधनसुविधांचेर सुमार 61 कोटी रुपया खर्च केल्ले. तातूंत इनडोर आनी अ‍ॅथलेटीक ट्रॅक (सिंथेटीक धांवपट्टी), पोरण्या बॅडमिंटन कोर्टाचें सराव मैदान नुतनीकरण, स्विमिंग पुलाचें नुतनीकरण, वीज उपकरणां आनी हेर सुविधांचो आस्पाव आशिल्लो. जाल्यार सुमार 2380 कदेलांची वेवस्था आशिल्ल्या अ‍ॅरकंडिशन इनडोर स्टेडियमाचेर सुमार 40कोटी रुपया खर्च केल्ले.

ह्या मैदानाचें उक्तावण लुसोफोनिया खेळां सर्तीच्या तीन दीस आदीं म्हणल्यार 15 जानेवेरी 2014 ह्या दिसा जाल्लें. ते उपरांत 18 ते 29 जानेवारी ह्या काळांत लुसोफोनिया सर्त हे सुवातेचेर खेळयिल्ली. ह्या वेळार स्टेडियमांत ज्युडो, तायक्वांडो, टेबल टेनीस, इशू, मार्शक आर्ट, बॉक्सींग, एरिना हे खेळ खेळयिल्ले. पूण सध्या देखरेखी कडेन लक्ष दिवंक नाशिल्ल्यान मैदानाची वाट लागल्या.

सध्या मैदानाच्या कोर्टा सयत, जनेलां आनी वण्टी वयल्या लांकडी फर्निचराक वाळटी लागून तें पेड्डेर जालां. अशाच दर्जो नाशिल्ल्या आनी नादुरुस्त स्थितींत आशिल्ल्या ह्या मैदानाचेर शालेय विद्यार्थ्यांचो आंतर विद्यालयीन सर्ती घेतात.

इनडोर मैदानाच्या शौचालयाच्या जनेलाचे हारशे चोरयेक गेल्यात. स्टेडियम इमारतीक बरें रूप दिवचे खातीर प्रवेशदाराचे कुशीक बसयिल्ल्या फायबर ग्लासाचे कुडके काडून चोरून व्हेल्यात. खेळां मैदानाची ही आवतिकाय पळोवन शालेय खेळगड्यां मदींय नाराजी पातळ्ळ्या. ह्या मैदानाचें बांदकाम गोंय राज्य मुळाव्या साधन सुविधा म्हामंडळान (जीएसआयडीसी) केलां. राज्य खेळां आनी युवा वेव्हार संचालनालय (डीएसव्हायए) आनी गोंय खेळां प्राधिकरण (एसएजी) हांचे सयत जीएसआयडीसी हांचे मदीं समन्वयाचो उणाव आशिल्ल्यान मैदानाचे देखरेखी कडेन आडनदर जाल्या. ह्या मैदानाचो कारभार सुरक्षा रक्षकांच्या हातांत आसा. बांबोळी मैदाना वयल्या अधिकाऱ्यांची ह्या मैदानाचे इंचार्ज म्हूण नेमणूक केल्या.

खेळां परस हेर गजालीं खातीर चड वापर…

लुसोफोनिया खेळां सर्ती उपरांत सत्तादारी पक्षांच्यो जाहीर सभा, वैजकी शिबिरां तशेंच कोरोना म्हामारी वेळार बिगर गोंयकार कामगारांक तांच्या मूळ गांवांत धाडी मेरेन ह्या स्टेडियमाचेर रावपाची वेवस्था केल्ली. तशेंच ह्या मैदानाचेर गिरेस्तांच्या भुरग्यांचें लग्न सुवाळेय आयोजीत केल्ले. आदल्या खेळां मंत्र्याच्या कार्यकाळांत हें मैदान लग्न सुवाळ्यां खातीर भाड्यान दिल्लें.

शालेय खेळगडे खेळटात गरमेंत…

मैदानाचेर संवसारीक दर्ज्याचें अ‍ॅरकंडिशन संचाची वेवस्था केल्या. ह्या अ‍ॅरकंडिशन संचां खातीर व्हड प्रमाणांत वीज पुरवण जाय पडटा. ते भायर ताचे देखरेखीचो खर्च लेगीत लाखांच्या घरांत आसा. लुसोफोनिया खेळां सर्त सोंपले उपरांत लेगीत कांय म्हयने हे अ‍ॅरकंडिशन वेवस्थेचो वापर केलो. पूण ते उपरांत ती बंदूच आसा. ताका लागून हीं उपकरणां पेड्डेर जावपाची शक्यताय आसा. अ‍ॅरकंडिशन वेवस्थेक लागून थंय पंख्यांची वेवस्था करूंक नाशिल्ली. ताका लागून सध्या शालेय खेळगड्यांक खेळां सर्ती खेळटना गरमेचो त्रास सोसचो पडटा.