भांगरभूंय | प्रतिनिधी
म्हापशें: पेडें म्हापशें जंक्शन राष्ट्रीय म्हामार्ग रुंदीकरणाक लागून सध्या अपघातांची सुवात जाल्या. सरकाराक हाचेर अजून मेरेन सासणाचो उपाय काडप शक्य जावंक ना. दोनूय सर्वीस रस्त्याचें काम पुराय जाले उपरांत भुंयारी मार्गाची वेवस्था करिनासतनाच जंक्शना वयलें क्रॉसींग बंद करपाचो विकास प्रशासनान चलयला. ताका लागून कामरखाजन आनी पेडें वाठारांत रावपी लोकां मुखार व्हड समस्या उबी रावपाची शक्यताय निर्माण जाल्या.
ह्या जंक्शना वयलें हें क्रॉसिंग बंद जालें जाल्यार वाहनचालकांक म्हापशें शारांत येवपा- वचपा खातीर तार जंक्शन आनी करासवाडो जंक्शनाक भोंवताडो घालचो पडटलो. म्हामार्ग रुंदीकरणा उपरांत लोकांच्या चेपणाक लागून हें जंक्शन उक्तें दवरिल्लें. हाचो परिमाण म्हणल्यार थंय अपघात वाडपाक लागल्यात. हे अपघात आडावचे खातीर म्हापशें पालिकेन थंय येरादारी सिग्नल उबारपाचो थाराव घेतिल्लो.
सध्या राष्ट्रीय म्हामार्ग प्राधिकरणान हें जंक्शन तें करासवाडो जंक्शन मेरेनच्या सर्वीस रस्त्याचें काम पुराय करपाक सुरवात केल्या. हें काम पुराय जाले उपरांत क्रॉसींग जंक्शन सासणाचें बंद करपाची तयारी प्रशासनान चलयल्या, अशी म्हायती मेळ्ळ्या. हे संबंदांत प्रतिक्रिया उक्तायतना उपसभापती ज्योशुआ डिसोझा हांणी सांगलें, पेडें जंक्शना वयल्या सर्वीस रस्त्याचें काम फुडल्या म्हयन्या भितर पुराय जातलें. पेडें जंक्शना वयल्या वाडट्या अपघातांचेर उपाय काडचे खातीर उपाय येवजण चालीक लायतले, असो भरवसो भौशीक बांदकाम मंत्र्यान दिल्लो. सर्वीस रस्त्याक लागून आतां येरादारींत सुसुत्रता येतली आनी लोकांची समस्या सुटावी जातली.
येवजण आंखपाची सुचोवणी केल्याः ज्योशुआ
पेडें जंक्शनाचेर अपघात जावचे हे खातीर आपूण यत्न करतालों, पूण तें जंकशन क्रॉसींग चालूच दवरचें, अशी थंयच्या लोकांची मागणी आशिल्ली. ताचे परिणाम आतां आमी सगळे पळयतात. ताचेर इल्ली तरी तडजोड करचीच पडटली. करासवाडो जंक्शनाचेर उड्डाण पुलाचें अलायमेंट वेवस्थीत ना. ताका लागून ह्या जंक्शनाचेर दीसपट्टी कोंयडी जाता. भौशीक बांदकाम खातें आनी राष्ट्रीय म्हामार्ग प्राधिकरणाक ताचेर एकठांय येवन येवजण आंखपाची सुचोवणी केल्या, अशें उपसभापती ज्योशुआ डिसोझा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
