भांगरभूंय | प्रतिनिधी
पेडणें: पेडणें म्हालांतल्या बायलांचे सुरक्षितताये खातीर एका काळांर सामकी उपेगी थारिल्ली पिंक फोर्स सेवा सध्या फकत जनरल ड्युटी म्हणल्यार सकाळीं ९ ते सांजेवेळार ५.३० वरां मेरेन कार्यरत दवरता. हाका लागून जायत्या बायलांक आनी चलयांक आडमेळीं येतात. आदीं ही सेवा २४ वरां उपलब्ध आशिल्ली, हाका लागून बायलांक खंयच्याय आपत्कालीन परिस्थितींत धाडसान कागाळ नोंद करपाक मेळटाली. मात आतां सांजेवेळार पांचा उपरांत ही सेवा बंद आशिल्ल्यान बायलांचे सुरक्षिततायेचेर व्हड प्रस्न निर्माण जाला.
बायलांचेर अत्याचार, छेडछाड, विनयभंग असल्या घडणुकां खातीर ही सेवा उपेगी थारिल्ली. पेडणेंच्या जायत्या बायलांनी हाका लागून निर्भयपणान कागाळी नोंद केल्ल्यो. मात, हालीं पिंक फोर्स ही फकत दिसाचीच कार्यरत आशिल्ल्यान सांजेवेळार घडपी घडणुकांक रोखडोच प्रतिसाद मेळना. जायते फावटीं बायलांक थळाव्या पुलीस स्टेशनांत वचून कागाळ दिवची पडटा.
बायलांच्या आड जावपी गुन्यांवां मदीं हालींच्या काळांत कांय प्रमाणांत वाड दिसून आयली. हाका लागून अशा सेवांचो आनी तांचें सशक्तपणान कार्यरत आसप गरजेचें. फकत येवजण्यांची घोशणा करिनासतना त्यो राबोवप हीच खरी बायलां-सुरक्षेची दिका.
पेडणें पुलीस स्टेशनाच्या प्रशासनान आनी संबंदीत वरीश्ठ पुलीस अधिकार्यांनी ह्या मुद्यांकडेन खरपणान लक्ष दिवन, पिंक फोर्स परत २४ वरां उपलब्ध दवरची, अशी मागणी पेडणेंची जनता करता. ही मागणी फकत सोयी खातीर न्हय, तशेंच बायलांच्या अस्तित्वाच्या सुरक्षितताये कडेन जोडलां, काळा प्रमाण हें लक्षांत घेवप गरजेचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
