भांगरभूंय | प्रतिनिधी
महादेव गवंडीन विचारलो मंत्र्याक जाब; थळावे लोकूय बेजार
भांगरभूंय । प्रतिनिधी
पेडणें: राष्ट्रीय उत्सव पडणेंच्या सरकारी संकुलांत मनयतात. त्या वेळार थळाव्या आमदाराचे हस्तुकीं झेंडा हुबवपाची परंपरा आशिल्ली. हे खेपे मात ही परंपरा थळाव्या आमदाराक कुशीक दवरून दुसऱ्या मतदारसंघांतल्या आमदारान झेंडा हुबयलो. हाका लागून थळावे लोक बेजारल्यात आनी सरकारान हाचेर स्पश्टीकरण दिवचें, अशी मागणी केल्या.
19 डिसेंबराचे निमंत्रण पत्रिकेचेर थळावे आमदार प्रवीण आर्लेकार हांकां सुवात दिवंक ना. हे कार्यावळींत थियेचे आमदार तशेंच नुस्तेमार मंत्री नीळकंठ हळर्णकार हांचे हस्तुकीं झेंडावंदन जालें.
शाहू फुले आंबेडकर प्रतिश्ठानाचे अध्यक्ष तशेंच पत्रकार महादेव गवंडी हांणी मंत्री हळर्णकार हांकां हे विशीं जाब विचारतना थळाव्या आमदाराक निमंत्रण पत्रिकेचेर सुवात कित्याक दिवंक ना, असो तांणी प्रस्न विचारलो. हळर्णकार हांणी ताका जाप दितना सांगलें, तूं अजून ल्हान आसा. तुका हे संबंदांत गिन्यान नासत, पूण सरकाराच्या प्रोटोकॉला प्रमाण सरकारान झेंडावंदना खातीर मंत्र्याची निवड केल्या. मुख्यमंत्र्यान पेडणेंकारांचो अवमान केला. तांचे कडल्यान ही अपेक्षा नाशिल्ली. मंत्र्याचे हस्तुकीं जरी झेंडा हुबयलो तरीय निमंत्रण पत्रिकेचेर आमदाराचें नांव घालप गरजेचें आशिल्लें. तेचवरी मांद्रें मतदारसंघाच्या आमदाराचें लेगींत निमंत्रण पत्रिकेचेर नांव घालूंक नाशिल्ल्यान गवंडी हांणी प्रतिक्रिया दितना नाराजी उक्तायली.
आमदारान येवप बंधनकारक आशिल्लेः हळर्णकार
निमंत्रण पत्रिकेचेर जर आमदाराचें नांव नासलें तरीय त्या आमदारान स्वता जावन हे कार्यावळीक येवपाची गरज आशिल्ली. हे इतले सगळे लोक आयल्यात तांकां कोणे निमंत्रण दिवंक ना. निमंत्रण पत्रिकेचेर आमदारांचीं नांवां दिवपाक तीं कितें लग्नाची पत्रिका न्हय, थंय जावंय आनी भावोजीचें नांव दिवपाक. ज्या स्वातंत्रसैनिकांनी गोंय मुक्ती खातीर लडो दिलो आनी त्या लड्यांतल्यान आमकां हें स्वातंत्र्य मेळ्ळां. त्या स्वातंत्र्यसैनिकांचो मान दवरचे खातीर आमदारान हे कार्यावळीक येवप बंधनकारक आशिल्लें, अशें मंत्री नीळकंठ हळर्णकार हांणी सांगलें.
नांव दिवप बंधनकारक आशिल्लेः आर्लेकार
आपूण पेंडणें मतदारसंघाचो लोकप्रतिनिधी. ताका लागून सरकारान निमंत्रण पत्रिकेचेर आपलें नांव घालप बंधनकारक आशिल्लें. पूण नांव घालूंक ना, कोणाच्या हातांतल्यान झेंडावंदन जालें, ताका म्हत्व ना. निमंत्रण पत्रिके वयल्यान थळाव्या आमदाराक कुशीक दवरप म्हणल्यार त्या मतदारसंघांतल्या लोकांक कुशीक दवरप, अशीं प्रतिक्रिया आमदार प्रवीण आर्लेकार हांणी नाराजीच्या सुरांत दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
