भांगरभूंय | प्रतिनिधी
नियंत्रण दवरपाक पेडणें पुलीस अपेशी; नव्या वर्साची उमेद अजून सोंपना
भांगरभूंय । प्रतिनिधी
पेडणें: आवाज प्रदुशणा विशींचे खर केल्ले नेम कागदाचेर भक्कम दिसतात, मात ताची अंमलबजावणी जाय तशी जायना. पेडणें म्हालांतल्या दर्यादेगे वयलें आवाजाचें प्रदुशण आडावपाक पेडणें पुलीस अपेशी थारल्यात. रातच्या 10 उपरांत बिनधास्त पणान संगीत कार्यावळी चालू आसतात, त्या वेळार थंय पुलीस लेगीत आसतात, मात तांचेर कारवाय करिना. हाका लागून ह्या मुद्द्याचेर विवीध प्रतिक्रिया त्या वाठारांत आयकुपाक मेळटात.
रातच्या 10 वरां उपरांत आवाजाचें प्रदुशण करपी सगळे तरेच्या संगिताचेर निर्बंध घातल्यात. जर आवाजाचें प्रदुशण जालें जाल्यार ताची पुराय जापलासदारकी ही थळावे पुलीस अधिकारी, म्हाल उपजिल्होधिकारी हांचेर आसतली आनी तांचेरूच कारवाय करतले, अशें उच्च न्यायालयान म्हणलां. तरीय दर्यादेगें वयल्या संगीत कार्यावळींचेर संबंदितां कडल्यान आडनदर चल्ल्या.
नातलां निमतान सुरू जाल्ल्यो संगीत रजनीच्यो पार्ट्यो अजून मेरेन सद्दां रातच्या 10 उपरांत सुरू जातात आनी फांतोडे मेरेन चलतात. पूण पुलीस आनी अधिकारी म्हणटात, कोणाचीच लेखी कागाळ ना जाल्यार आमी कारवाय कशे करतले? तांचे हे भुमिकेक लागून थळाव्या लोकांच्या मनांत तांच्या प्रामाणीकपणा विशीं दुबाव येवपाक लागला.
संगीत रजनी आयोजीत करचे खातीर 31 डिसेंबराक सरकारान रातच्या 12 वरां मेरेन मेकळीक दिल्ली. पूण त्या दिसा फांतोडे मेरेन चलिल्ल्या पार्ट्यांचेर सरकारान कसलीच कारवाय करूंक ना. त्या दिसा सगळेच मजा करपाचे उमेदीन आसतात, ताका लागून त्या दिसा कोणेच ह्या पार्ट्यां आड कोणेच कागाळ करूंक ना. पूण ते उपरांत सद्दां 10 उपरांत चलपी पार्ट्यांचेर कारवाय जातली अशी आस्त लोकांनी बाळगिल्ली. सरकारान अधिकाऱ्यांक योग्य सुचोवण्यो करून रातच्या 10 वरां उपरांच चलपी पार्ट्यांचेर कारवाय कित्याक करिना, असो प्रस्न थळाव्या लोकांनी उपस्थीत केला.
आश्वे मांद्रेंच्या एका रॅस्टोरंण्टांत रातच्या 10 वरां मेरेन संगीत वाजोवपाक आमकां परवानगी दिवची अशी फाटलीं आठ वर्सां आमी मागणी करतात. पूण एकूय वर्स आमकां तशी परवानगी दिवंक ना, अशी म्हायती बंगळुरूच्या एका रॅस्टोरंण्ट चालकान आपलें नांव उजवाडावचें न्हय हे अटीचेर दिली. ताणें फुडें सांगलें, आमी दर शुक्रारा ह्या रेस्टॉरंण्टांत देशी- विदेशी पर्यटकांची मनरिजवण करचे खातीर रातच्या 11 वरां मेरेन ल्हान स्वरुपांत पार्ट्यो आयोजीत करतात. पूण अधिकारी आमकां परवानगीच दिना. आमच्या संगिताचो शेजाराऱ्यांक त्रास जायना, तरी लेगीत पुलीस येवन पार्ट्यो बंद उडयतात. नातलां निमतान मोरजी, आश्वें, मांद्रें, हरमल ह्या दर्यादेगेंचेर सुरू जाल्ल्यो पार्ट्यो अजून लेगीत रातच्या 10 उपरांत चलतात. आश्वेच्या एका रेस्टॉरंण्टांत जाल्यार फांतोडे मेरेन पार्ट्यो चलतात. मेळिल्ले म्हायती प्रमाण तें रेस्टॉरंण्ट एका चित्रपट अभिनेत्याच्या चल्यान भाड्याक घेतलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
