भांगरभूंय | प्रतिनिधी
पेडणें, प्रतिनिधी : पेडणें म्हालांतल्या राष्ट्रीय म्हामार्ग ६६ पत्रादेवी ते धारगळ म्हाखाजन मेरेनच्या रस्त्या कुशीक व्हड दोंगराचीं पालसणां कोसळिल्लीं आसात. हातूंत धारगळ महाखाजन पोरसकडें ह्या राष्ट्रीय म्हामार्गावेलीं आनीकूय पालसणां कोसळपाची शक्यताय आसा. हाचे कडेन सरकारान आनी भौशीक बांदकाम खात्यान लक्ष दिवचें आनी व्हड घडणूक घडचे पयलीं कितेंय उपाय काडचे, अशी मागणी नागरिकांनी केल्या.
पालसणां कोसळिल्ले सुवातेक सगळ्यांत पयलीं विरोधी पक्षाच्या आमदारांनी, फुडार्यांनी भेट दिली. उपरांत मुख्यमंत्री डॉ. प्रमोद सावंत हांणी थळावे आमदार, सरपंच हांकां कोणाक कांयच सांगिनासतना हांगची पळोवणी केली. मात फुडलो निर्णय कितें घेतला? हें तांकांच खबर अशी प्रतिक्रिया सध्या पेडणें म्हालांतले कांय जागृत नागरीक सोशियल मिडिया वरवीं उक्तायतना दिसता.
फाटल्या वर्सा राष्ट्रीय म्हामार्ग ६६ चेर धारगळ म्हाखाजनान व्हडा प्रमाणांत पालसणां कोसळिल्लीं. तेच वटेन अंदूं दुसरे खेपे पालसणां कोसळ्ळीं. जाल्यार मालपें बायपास राष्ट्रीय म्हामार्ग ६६चेर फाटल्या वर्सा व्हडा प्रमाणांत पालसणां कोसळिल्लीं. ताका लागून ह्या रस्त्या कुशीक राखणे वणट उबारिल्ली. मात अंदूं परत हे सुवाते पालसणां सयत राखणे वणटूय कोसळ्ळी. उपरांत चार दिसांनी दुसरे वटेनचींय पालसणां कोसळिल्ल्यान रस्तो बंद केलो.
हांगा सगळ्याक व्हड पालसणां कोसळ्ळ्या उपरांत आतां उगवें, तांबोसे ह्या वाठारांतल्या राष्ट्रीय म्हामार्ग ६६ चेरूय पालसणां कोसळपाचो भंय नागरीक उक्तायतात.
उदकाचे टाकयेकूय धोको
धारगळ महाकखाजन राष्ट्रीय म्हामार्ग ६६ चेर व्हडा प्रमाणांत पालसणां कोसळ्ळ्यांत. ताचे कुशीक एक मुळावे शाळेची इमारत आसा. फुडाराक अशींच पालसणां कोसळत रावल्यार हेय शाळेक धोको निर्माण जातलो. तशेंच ह्या पालसणां फाटल्यान धारगळच्या लोकांची उदकाची समस्या सोडोवपी एक व्हड उदकाची टांकी आसा. तेय टाकयेक धोको आसा.
आश्वें-मांद्रें पालसणां कोसळतूच आसा
आश्वें-मांद्रें, आजोबा देवळा कुशीक आशिल्ल्या दोंगराचीं पालसणां परत कोसळ्ळ्यां. फाटल्या पांच वर्सां आदीं हांगा व्हड पालसणां कोसळिल्लीं. आनी रस्तो पुरायेन बंद जाल्लो. उपरांत भौशीक बांदकाम खातें, रस्तो विभागा वतीन हांगा राखणे वणट उबारपाची येवजण केल्ली. हे वणटीचें भुमीपुजन थळावे आमदार दयानंद सोपटे हांचे हस्तुकीं जाल्लें. मात ही वणट आजून पुराय जावंक ना. ती अर्दी बांदिल्ले अवस्थेंत आसा. ताका लागून हांगा आनी पालसणां कोसळपाचो भंय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
