भांगरभूंय | प्रतिनिधी
‘मिशन फॉर लोकला’चो अभिनव उपक्रम
पेडणें: पेडणेंचे मोटरसायकल पायलट आनी रिक्षा चालकांक अपघात विमा कवच दिवपाचो अभिनव उपक्रम मिशन फॉर लोकल, पेडणें वतीन राबयलो. बुधवारा स. भाऊसायब बांदोडकर हांचे जयंती दिसा संस्थेचे संस्थापक राजन कोरगांवकार हांचे हस्तुकीं विमा पॉलिसीं लावार्थ्यांक वांटल्यो.
मोटरसायकल पायलट ही संकल्पना फकत गोंयांतूच आसा. स. बांदोडकर हांच्या कार्यकाळांत हो वेवसाय सुरू जाल्लो. बहुजन समाजाक आत्मनिर्भर आनी स्वावलंबी करपाचे नदरेन तो सुरू जालो. कश्ट आनी सगल्यांत म्हत्वाचो विस्वास दवरीत ह्या घटकांनी आपली एक वेगळी वळख निर्माण केली. सध्याच्या सर्तीच्या आनी गडबडीचे जिणेंत ह्या वेवसायिकां मुखार जायतीं आव्हानां उबीं आसात. अंकटाच्या काळांत तांकां मजतीचो हात मेळचो आनी तोय कोणाच मुखार हात पातळचे न्हय म्हणून ही विमा पॉलिसी तयार केल्ल्याचें कोरगांवकार हांणी म्हणलें.
अपघाताच्या काळांत ५ लाख रूपयां मेरेन विमो, वैजकी उपचारां खातीर २ लाखां मेरेन खर्चाची हमी तशेंच अपघातांत जखमी जावन घरा रावचें पडल्यार म्हयन्याक १५ ते २० हजार रूपयांची अर्थीक मजत ह्यो येवजण्यो लावर्थ्यांक मेळटल्यो. पेडणेकरांनी जतनायेन ह्यान फुडें पेडणेंचे प्रतिनिधित्व हें पेडणेंच्या भूमीपुत्राकूच दिवपाची आसा. तेन्नाच पेडणेंकारांक न्याय मेळटलो अशें कोरगांवकार हांणी सांगलें. पेडणेंकार आपल्या पांयाचेर उबो रावचो आनी स्वावलंबी जावचे खातीरूच मिशन फॉर लोकलाची संकल्पना फुडें आयली अशेंय तांणी सांगलें .
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
