भांगरभूंय | प्रतिनिधी
खर आंदोलन करपाची शिटकावणी ः तुकाराम हरमलकार
पणजी ः सध्या रेंवेची बेकायदेशीर येरादारी करप व्हड प्रमाणांत चालू आसा. गोंयांतल्यान कर्नाटक, महाराष्ट्रा वा महाराष्ट्रा कर्नाटकांतल्या गोंयांत रेंवेची येरादारी चालूच आसता. हे संबंदी जायते फावटीं पुलिसांनी बेकायदो रेंव व्हरप्यांक धरुन कारवाय लेगीत केलां तरी लेगीत रातच्या वेळार ट्रकांतल्यान रेंवेची बेकायदो येरादारी करप सुरुच आसता.
पेडणें तालुक्यांतल्या तेरेखोल न्हंयेंत रेंव काडप चालू आसा. तेच वेळार महाराष्ट्रांतल्यानय रेंव गोंयांत येता. देखूनच हे संबंदी आदलो जिल्हो पंचायत वांगडी तुकाराम हरमलकार हांचे वांगडा पोरसकडे पंच राकेश स्वर हांणी आयज पत्रकार परिशद घेतली.
हे वेळार पेडणें तालुक्यांतल्या तेरेखोल न्हंयेंत जी रेंव काडता ती पयलीं कायदेशीर करपाक जाय आनी उपरांतच महाराष्ट्रांतल्यान येवपी रेंव सुरू करपाक जाय नाजाल्यार खर आंदोलन जातलें अशी शिटकावणी तुकाराम हरमलकार हांणी दिली. पेडणेंच्या दोनूय आमदारांनी हांतूत लक्ष दिवन पयली रेंवेचो धंदो सुरू करचो आनी उपरांतच महाराष्ट्रांतली रेंव गोंयांत हाडची अशें तुकाराम हरमलकार हांणी हे वेळार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
