भांगरभूंय | प्रतिनिधी
भांगरभूंय । प्रतिनिधी
केरी-सत्तरीः पेठवाडो- कुडणे हांगच्या श्री महालक्ष्मी देवळांत 48वो लक्ष्मी पूजनोत्सव सुरू जालो. ह्या निमतान वेगवेगळ्यो कार्यावळी आयोजीत केल्यात. पयल्या दिसा महालक्ष्मी मूर्ती प्रतिश्ठापना, लक्ष्मी पूजन आनी तीर्थ प्रसाद जालो. दुसऱ्या दिसा डिंगण्याच्या अग्नियुग दांडिया पंगडान दांडिया कार्यावळ सादर केली.
बुधवार 26 ऑक्टोबराक सांजे 7 वरांचेर श्री महालक्ष्मी कलश बैठक देवस्थाना वतीन मुख्यमंत्री डॉ प्रमोद सावंत हांचो ज्येश्ठ नागरीक वसंत मायणीकार हांचे हस्तुकीं भोवमान करतले. कुडणेचो निवृत्त पुलीस उपनिरीक्षक गोकुळदास अनंत मळीक, समाज वावुरपी नारायण (दादा) मळीक, कुडणेचो आदलो सरपंच सर्गेस्त विठ्ठल मळीक (मेल्या उपरांत), रवळू (आपा) गुरव, शंकर खांडेकार, घनश्याम माडकार (मेल्या उपरांत) हांचो मुख्यमंत्र्यांचे हस्तुकी भोवमान जातलो. ह्या वेळार कुडणेचो सरपंच राजन फाळकार, कुडणेश्वर देवस्थानाचो अध्यक्ष उदय मळीक, महालक्ष्मी देवस्थानाचो अध्यक्ष राजेंद्र मायणीकार, पंच दामोदर पेठकार हाजीर रावतले. भोवमान कार्यावळी उपरांत भुरग्यांची सांस्कृतीक कार्यावळ जातली.
बिरेस्तार 27 ऑक्टोबराक शिरगांवच्या श्री लईराई महिला घुमट आरती मंडळा वतीन आरत्यो जातल्यो. रातीं 9 वरांचेर नटराज खेळ आनी सांस्कृतीक क्लबा वतीन जादूगार श्वेता पाटील हिची कार्यावळ जातली. शुक्रार 28 ऑक्टोबराक विष्णू शंभा ढवळे हाचे वतीन सत्यनारायण म्हापूजा, आनी दनपारां 1.30 म्हाप्रसाद जातलो. सांजे 6 वरांचेर थळाव्या भजनी मंडळाची कार्यावळ आनी रातीं 8 वरांचेर पावणी आनी रातीं 9.30 वरांचेर राधाकृष्ण संगीत अकादमी- हरवळे हांचे वतीन स्वरधारा ही नाट्यगीत, भावगीत गायनाची कार्यावळ जातली. तातूंत सुनील दिवाकर, देव दळवी, स्वानंदी नायक हे कलाकार वांटो घेतले. दत्तराज सुर्लकार ऑर्गनाचेर आनी संजय खसप तबल्यार साथ संगत करतले. भाविकांनी सगल्या कार्यावळींक हाजीर रावचें अशें देवस्थान समितीन मागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
