भांगरभूंय | प्रतिनिधी
गोंयची पेंवपी संजना प्रभुगांवकार हिणें 48वे ज्युनीयर राष्ट्रीय पेंवपा वस्तादपण सर्तींत पांच पदकां जिखलीं. हातूंत चार रुप्या पदकांचो जाल्यार एका कांश्या पदकाचो आस्पाव आसा.
सर्त ओडिशाची राजधानी भुवनेश्वरांतल्या बिजू पटनायक जलतरण तलावांत चालू आसा.
पयल्या दिसा संजनान 2.09.69 वेळां सयत 200 मिटर फ्री स्टायल (बायलांची 15 ते 17 वर्सां)त पयलें रुप्या पदक जिखलें. हातूंत भांगरा पदक महाराष्ट्राचे आन्या वालान जोडलें. जाल्यार कांश्या पदक तेलंगणाचे वृत्ती अग्रवालान जोडलें.
100 मिटर बॅकस्ट्रोक प्रकारांत (बायलांची 15 ते 17 वर्सा) संजनान आपलें दुसरें रुप्या पदक जिखलें. तांणी 1.07.09न सर्त पुर्ण केली. भांगरा पदक कर्नाटकाचे रिद्धिमा विरेंद्र कुमार हिणें भांगरा पदक जाल्यार कर्नाटकाच्याच नीना व्यंकटेश हिणें कांश्या पदक जिखलें.
तिसऱ्या दिसा जाल्ले 50 मिटर बॅकस्ट्रोकांत संजनान तिसरें रुप्या पदक जिखलें. तिणें 30.83 सेकंदांनी सर्त पुर्ण केली.
चवथ्या दिसा संजनान आपलें चवथें रुप्या पदक मेळयलें. तिणें 200 मिटर बॅकस्ट्रोक (बायलांची 15 ते 17 वर्सां) सर्त 2.25.90 वेळांत पुर्ण केली. पांचव्या आनी सर्तीच्या निमाण्या दिसा तिणें गोंया खातीर 100 मिटर फ्री स्टायल प्रकारांत कांश्या पदक जिखलें. सर्त पुर्ण करपाक तिका 1.00.62 वेळ लागलो.
संजना सध्या दुबय अॅक्वा नेशन स्पोर्ट्स अकादमी-एएनएसए, युएई दुबय हांगा प्रशिक्षक प्रदीप कुमाराच्या मार्गदर्शनाखाला प्रशिक्षण घेता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.