भांगरभूंय | प्रतिनिधी
पॅरा पावरफिल्टर सुधीरान राष्ट्रकूल खेळां सर्तींत इतिहास घडयलो. ताणें भारता खातीर भांगरा पदक जिखतना व्हड कामगिरी केली. राष्ट्रकूल खेळां सर्तींत भारताच्या खात्यांत आतां मेरेन वट्ट 6 भांगरा पदकांची भर पडल्या.
सुधीरान 212 कील वजन उखलून भांगरा पदक जिखलें. हे सर्तींत भारतान पयलेच खेपे भांगरा पदक जिखलें.
पॅरा पावरलिफ्टिंगेंत भांगरा पदक जिखपी सुधीर भारताचो पयलो खेळगडो थारलो. ताणें दुसऱ्या यत्नांत 134.5च्या विक्रमी स्कोरा सयत 212 कील वजन उखल्लें. ताका अखेरच्या यत्नांत 217 कील वजन उखलपाक अपेस आयलें.
नायजेरीयाच्या इकेचुकवू क्रिस्तियन उबिचुकवून 133.6 गुणां सयत रुप्या पदक जाल्यार स्कॉटलॅण्डाच्या मिकी युलान 130.9 गुणां सयत कांश्या पदक जिखलें.
सिंधू, श्रीकांत क्वॉर्टरफायनलींत
किदम्बी श्रीकांत आनी पी व्ही सिंधू हिणें आपआपली मॅच जिखून बॅडमिंटनाचे क्वॉर्टरफायनलींत सुवात मेळयली. श्रीकांतान श्रीलंकेच्या दुमिंदू अबेविक्रमाक 21-9, 21-12 असो हारयलो. जाल्यार बायलांच्या एकोड्या गटांत सिंधून युगांडाचे हुसिना कोबुगाबे आड 21-10 आनी 21-9 अशा फरकान जैत जोडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
