भांगरभूंय | प्रतिनिधी
पणजी : भ्रश्टाचाराच्या माध्यमांतल्यान पुलीस उपनिरिक्षक पदांची भरती केल्या. ह्या घोटाळ्यांत वरिश्ठ अधिकाऱ्यांचोय आस्पाव आसून निवृत्त न्यायाधिशांच्या अध्यक्षते खाला कमिटी स्थापन करून ह्या प्रकरणाची बेगोबेग चवकशी जावची. हे विशीं कारवाय केलीना जाल्यार हे प्रकरण उच्च न्यायालय वा सर्वोच्च न्यायालयांत व्हरचें पडटलें, अशी शिटकावणी फातोड्डेंचे आमदार विजय सरदेसाय हांणी दिल्या.
पणजे शेनवारा घेतिल्ले पत्रकार परिशदेंत ते उलयताले. पुलीस उपनिरिक्षक, कॉन्स्टेबल, होमगार्ड सारक्या पद भरती खातीर घेतिल्ल्या शारिरीक चांचणेंत व्हड घोटाळो जाल्लो. हातूंत जे उमेदवार उत्तीर्ण जाले तांकां अनुत्तीर्ण थारायल्यात. नापास जाल्ल्यांक उत्तीर्ण थारायल्यात. हे विशीं पुलीस खात्यान कमिटी स्थापन केल्या. ते प्रमाण अशा प्रकाराची आठ प्रकरणां उक्ताडार आयल्या. ताका लागून पात्र उमेदवारांचेर अन्याय जायत आसून हातूंत घुस्पिल्ल्या अधिकाऱ्यांचेर कारवाय जावप गरजेचें, अशें विजय सरदेसाय हांणी सांगलें.
काॅस्टेबल पदाचे परिक्षेत उणें गूण घेतिल्ले उमेदवार दुसऱ्या दिसा घेतिल्ले पीएसआय परिक्षेंत उत्तीर्ण जाल्यात. हो व्हड घोळ आसून ही भरती बेगोबेग रद्द करची. तशेंच हातूंत घुस्पिल्ल्या वरिश्ठ अधिकाऱ्यांचेर कारवाय करची, अशी मागणी विजय सरदेसाय हांणी केल्या.
ह्या प्रकरणाची दखल घेतली ना जाल्यार हाचे मुखार घोटाळ्या वरवीं नेमिल्ल्या उमेदवारांक चार्जशीट फायल करप आनी हेर गजालींचें गिन्यान नाशिल्ल्यान हाचो परिणाम राज्याचेर जातलो, अशेंय सरदेसाय हांणी म्हणलें.
मजगतीं, आमदार विजय सरदेसाय हांणी डीजीपींची भेट घेवन ह्या प्रकरणाची दखल घेवपाक सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
