भांगरभूंय | प्रतिनिधी
पणजी : ‘वारसा धोरण २०२५’ खाला गोंयचें दायज, इतिहासीक वास्तू, पोरणीं घरां, लोककला, परंपरीक वेवसायांचो सांबाळ आनी राखण करतले. पुर्तुगेज काळांतलीं घरां पर्यटना खातीर वापरपाक मेळचीं म्हूण नव्यो येवजण्यो हाडटले, अणें पुरातत्व मंत्री सुभाष फळदेसाय हांणी सांगलें. शुक्रारा पणजे जाल्ले पत्रकार परिशदेंत ते उलयताले. ह्या वेळार खात्याचे सचिव प्रसाद लोलयेंकार, संचालक निलेश फळदेसाय, उपसंचालक बालाजी शेणवी हजर आशिल्ले.
मंत्री फळदेसाय हांणी, दायज धोरणांत राज्यांतलीं १२२ खाजगी घरां, २२२ दायज थळां, ४६ लोककला आनी ६१ परंपरीक वेवसायांचो आसपाव केला. गरजे प्रमाण हातूंत आनीक गजालींचो आसपाव करतले. पुर्तुगेज काळांतल्या घरांची दुरुस्ती, सांबाळपा खातीर विशेश येवजण हाडपाचो विचार सुरू आसा. हातूंत व्याजमुक्त रीण वा हेर अर्थीक मजत दिवपाचो विचार आसा. असल्या घरां वरवीं सरकाराकूय महसूल मेळचे खातीर हांगा पर्यटन संबंदीत प्रकल्प राबयतले. अशी घरां खाजगीच उरतलीं अशीय म्हायती मंत्र्यांनी दिली.
वारसा धोरण तयार करचे पयलीं राज्यांतल्या विवीध भागधारकांची चर्चा केल्या. तांचे कडल्यान आयिल्ल्या सुचवण्यांचेर विचार करून धोरण राबयलां. गोंयचें दायज धोरण हेर राज्यां खातीर आदर्श थारतलें. हें धोरण बेगीनूच अधिसूचित करतले. हाचो काळ पांच वर्सांचो आसा. धोरणा प्रमाण गोंयची संस्कृती, सैमीक दायजाची व्याख्या करून तांचो सांबाळ करप, दायज गजालींचें वर्गीकरण करप, धोरणाच्या अंमलबजावणी खातीर गरजेच्या कायद्यांत बदल करण्यपाची शिफारस तशेंच विवीध कामां करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
