पुर्तुगालाची भिस्त रोनाल्डोचेर

भांगरभूंय | प्रतिनिधी

कतारांत 20 नोव्हेंबरा सावन सुरू जावपी संवसारीक फुटबॉल सर्ती खातीर पुर्तुगालान आपल्या पंगडाची घोशणा केली. अणभवी आनी स्टार खेळगडो क्रिस्तियानो रोनाल्डोचेर पंगडाची भिस्त आसतली.

रोनाल्डो वांगडा ब्रुनो फर्नांडीस आनी आंद्र सिल्वा ह्या अणभवी मदले फळयेंतल्या आनी आक्रमण फळयेंतल्या खेळगड्यांचो लेगीत पंगडांत आस्पाव केला. जाल्यार गोलकीपर म्हूण रई पॅट्रिसियो, दिएगो कोस्ता आनी जुझे हांचेर जापसालदारकी आसतली.

रोनाल्डोक मोठ्या सर्तींनी खेळपाक आवडटा. तो ह्या मोठ्या सर्तींनी गोल लेगीत करता. पूण, 2016तल्या युएफा युरो सर्त सोडली, जाल्यार ताका देशा खातीर एकूय करंड जिखून दिवपाक जमूंक ना.

पुर्तुगालाक संवसारीक सर्ती खातीर सहज प्रवेश मेळूंक ना. तांणी पात्रताय फेरयेंत तुर्की आनी मॅसेडोनिया हांकां हारोवन गटांत सर्बिया फाटोफाट संवसारीक सर्तीची पात्रताय मेळयली. सध्या चालू आशिल्ले नेशन्स लीग वस्तादपण सर्तींत लेगीत तांकां स्वित्झर्लेण्ड आनी स्पेन ह्या पंगडां आड हार घेवची पडल्या. तरी पूण पुर्तुगालाचो हो संवसारीक सर्तींतलो पंगड हो तांच्या इतिहासांतलो सगल्यांत बळिश्ट पंगड आसा.

पंगडः (गोलकीपर) दिएगो कोस्टा, रुई पॅट्रिसियो, जुझे सा, (डिफॅण्डर) दिएगो डालोट, डॅनिलो परेरा, जुआंव कॅन्सेलो, अॅंटोनियो सिल्वा, पेपे, रुबेन डायस, नुनो मॅंडीस, राफेल गुरेरो, (मिडफिल्डर) विल्यम कार्व्हालो, रुबेन नेव्हस, ओटावियो मोंतेरो, बर्नार्डो सिल्वा, मॅथ्यू न्युनेस, ब्रुनो फर्नांडीस, जुआंव मारियो, जुआंव पालहिन्हा, विटिन्हा, (फॉरवर्ड) आंद्रे सिल्वा, रिकार्डो होर्टा, क्रिस्तियानो रोनाल्डो, जुआंव फॅलिक्स, राफेल लिओ आनी गोंसालो रामोस.