पुरस्कार परत दिवचे नात, हें पयलींच बरोवन दियात: संसदीय समितीची शिफारस

भांगरभूंय | प्रतिनिधी

नवी दिल्ली, खबरां संस्था: देशांतल्या खंयच्याय राजकी मुद्द्याचेर वा धोरणाचेर जर आपली तिडक वा निशेध उक्तावपाचो आसल्यार जायते मानेस्त, साहित्यीक, कलाकार वा विवीध वाठारांतले पुरस्कार मानेली आपल्याक फावो जाल्लो पुरस्कार परत करतात. अशें करून सरकाराचे खंयचेय भुमिकेचो निशेध करपाचो मार्ग हे मानेस्त स्वीकारतात. मात अशें केल्ल्यान त्या पुरस्काराचो मान राखप जायना, अशें म्हणीत ‘मेळिल्लो पुरस्कार परत करचे नात,’ अशें पयलींच संबंधितां कडल्यान बरोवन घेयात, अशी शिफारस संसदीय समितीन केली. हाका लागून आतां निशेध करपाचो हो मार्ग मानेस्तां खातीर बंद जावपाची शक्यताय निर्माण जाल्या.
जदयूचे संजय झा हांचे अध्यक्षते खाला येरादारी, पर्यटन आनी संस्कृती विशयांचेर ही शिफारस केल्या. निशेध म्हणून आपले पुरस्कार परत करतात, मात ज्या अकादमीं कडल्यान तांकां हे पुरस्कार दितात तांचे कडेन मात ते बरे रावतात वा ते अकादमी खातीर काम करीत रावतात. हाका लागून तांचे कडल्यान ‘पुरस्कार परत दिवचे नात’ अशें पयलींच बरोवन घेवचें, अशी शिफारस संसदीय समितीन दिल्या.

सोमारा सादर जालो संसदेंत अहवाल
मजगतीं, हे समितीचो अहवाल सोमारा लोकसभेंत सादर जालो. खंयच्याय राजकी मुद्द्या कडेन सहमत नासल्यार ताचेर निशेध म्हणून अशे तरेन पुरस्कार परत दिल्ल्या मानेस्तांचोय ह्या अहवालांत उल्लेख केलो. मात ज्या मुद्द्यांचेर तांणी निशेध केलो, ते राजकी मुद्दे हे संबंदीत सांस्कृतीक परिघ वा अकादमीच्या कार्यक्षेत्राच्या भायले आशिल्ले, अशें अहवालांत नमूद केलां.