भांगरभूंय | प्रतिनिधी
विकेटकीपर बॅट्समन अरुण कार्तिकाचो नाबाद शेंकड्या नेटार पुडुचेरीन पर्वरी येजमान गोंया आड चालू आशिल्ले रणजी करंड सर्तीच्या एलीट सी गटांतले मॅचीच्या दुसऱ्या दिसा 6 विकेटी वगडावन 299 धांवड्यो केल्यो. अशे तरेन गोंया आड ताणें अजून मेरेन 76 धांवड्यांची म्हत्वाची आघाडी घेतली.
गोंयचो पयलो डाव पयल्या दिसा 223चेर सोंपिल्लो. मजगतीं, पुडुचेरीन काल बिनबाद 17 धांवड्यां वयल्यान मुखार खेळपाक सुरवात केली. पूण, सकाळींच ताचो अरविंद कोठंडापानी (4) बाद जालो. लक्ष्य गर्गान दुसऱ्या दिसाच्या पयल्याच बॉलाचेर ताका बाद केलो. ते उपरांत गोन्नाबत्तुला चिरंजिवी (7) बाद जालो. दर्शन मिशाळान ताची विकेट घेतली. पयल्या दिसा नाबाद आशिल्लो ओपनर नयन कंगायनान डाव सांबाळपाचो यत्न केलो. पूण, तो लेगीत वैयक्तीक 37 धांवड्यो करून तंबूंत परतलो. ताका मिशाळान बोल्ड केलो. नयन बाद जालो त्या वेळार पुडुचेरीची स्थिती 3 बाद 55 अशी जाल्ली.
ते उपरांत आयिल्लो पारस डोगराक (12) लेगीत चड वगत खेळपट्टीचेर तग धरपाक जमलो ना. ताका लागून मिशाळान बाद केलो. ते उपरांत अरुण कार्तिक आनी मुखेली दामोदरन रोहित हांणी डाव सांबाळपाचो यत्न केलो. दोगांयनी पांचवे विकेटी खातीर अर्द शेंकड्याची भागिदारी केली. पूण, जेवणाच्या विसवा पयलीं दामोदरन हो मिशाळाच्या बॉलाचेर बोल्ड जालो.
दर्शनाची ही चवथी विकेट आशिल्ली. जेवणा खातीर खेळ थांबिल्लो त्या वेळार पुडुचेरीन 5 विकेटी वगडावन 129 धांवड्यो केल्ल्यो.
दुसऱ्या सत्रांत पुडुचेरीन मात एकूय विकेट वगडावंक ना. ह्या सत्रांत कार्कितान अर्द शेंकडो पुर्ण केलो. च्या च्या विसवा खातीर खेळ थांबलो त्या वेळार पुडुचेरीन दोन धांवड्यांची आघाडी घेतिल्ली.
तिसऱ्या सत्रांत सिद्धेश लाडान अंकिताक (78) बाद केलो. बाद जावचे पयलीं अंकितान अरुणा वांगडा सवे विकेटी खातीर 143 धांवड्यांची भागिदारी केली. ते उपरांत अरुण कार्तिकान आपलो शेंकडो पुर्ण केलो. दुसऱ्या दिसाचो खेळ सोंपलो त्या वेळार अरुण 113 आनी कृष्णा पांडे 21 धांवड्यांचेर खेळटालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
