भांगरभूंय | प्रतिनिधी
भारतान येजमान बांगलादेशा आडचे पयले टॅस्टीच्या पयल्या दिसा 6 विकेटी वगडावन 278 धांवड्यां मेरेन मजल मारली. भारता वतीन चेतेश्वर पुजारान 203 बॉलांनी 90 धांवड्यो केल्यो. जाल्यार श्रेयस अय्यर 82 धांवड्यो करून खेळपट्टीचेर आसा. ऋषभ पंतान 45 बॉलांनी 46 धांवड्यो केल्यो.
बांगलादेशा वतीन दावखुरो स्पिनर तैजुल इस्लामान 3 जाल्यार मेहदी हसनान 2 विकेटी घेवन भारताचो टॉप ऑर्डर गडगडावन उडयलो.
पयलीं बॅटींग करपी भारताची सुरवात बरी जाली ना. शुभमन गिल आनी लोकेश राहुल हे जोडयेन 41 धांवड्यांची भागिदारी केली खरी. पूण, दोगांयनी खेळपट्टीचेर जम बसयलो अशें दिसता आसतना तैजुल इस्लामान शुभमन गिलाक 20 धांवड्यांचेर बाद केलो. ताच्या फाटोफाट राहुल लेगीत खालेद अहमदाच्या बॉलाचेर 22 धांवड्यो करून बोल्ड जालो.
दोनूय ओपनर तंबूंत परतून गेल्या उपरांत चेतेश्वर पुजारा आनी विराट कोहली हे डाव सांबाळटले अशें दिशिल्लें. पूण, तैजुलान उत्कृश्ट स्पीन बॉलाचेर कोहलीक एके धांवडेचेर एलबीडब्ल्यू बाद केलो.
भारताची स्थिती 3 बाद 48 अशी जाल्ली. त्या वेळार पंताक बडती दिवन मैदानांत धाडलो. ताणें आपले आक्रमक शैलींत बॅटींग करून धांवतकटो मुखार व्हेलो. पुजारान एक बाजू सांबाळून दवरिल्ली. जेवणाच्या विसवा मेरेन भारताक शंबराचो आंकडो हुपून दिलो. जेवणाच्या विसवा पयलीं 30 धांवड्यांचेर खेळपी पंत विसवा उपरांत 45 बॉलांनी 46 धांवड्यो करून बाद जालो.
ते उपरांत पुजारा आनी श्रेयस अय्यर हांणी डाव सांबाळ्ळो. दोगांयनी पांचवे विकेटी खातीर 149 धांवड्यांची भागिदारी केली. पुजारा शेंकड्याच्या लागसार पावल्या उपरांत तैजुला ताका बाद केलो. पुजारान 90 धांवड्यो केल्यो.
पयल्या दिसाचो खेळ सोंपलो त्या वेळार भारतान 90 ओव्हरींनी 6 विकेटी वगडावन 278 धांवड्यो केल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
