भांगरभूंय | प्रतिनिधी
भांगरभूंय । खेळां मेज
पणजीः पणजी जिमखाना मेंबर्स लीग टी-20 क्रिकेट सर्तींत आयतारा जिमखाना मैदानार जाल्ले मॅचींत पोरूंचो वस्ताद प्रेसकॉन पार्टनरान आरसी गोंयचो 6 विकेटींनी जाल्यार प्रायोरिटी टायटन्सान एकतर्फी मॅचींत धेंपो चॅलेंजर्सांक हारयलें.
पयलीं खेळून आरसी गोंयान आपल्या डावांत 7 बाद 133 धांवड्यो केल्यो. तांचे फकत पांच खेळगडे दोन अंकी धांवड्यो करपाक शकले. स्वयंम नायकान 28 बॉलांत सगल्यांत चड 35 धांवड्यो केल्यो. विकेटकीपर बॅट्समन महेंद्र पै कुचेलकार हांच्या वांगडा 17 बॉलांत ताणे 23 धांवड्यांची भागिदारी केली. प्रेसकॉनाच्या इफ्तिकार आगा, अजय पेडणेकार, बुद्धदेव मंगलदास आनी सैफ अली काराजगी हांणी दरेकी एक विकेट घेतली.
प्रेसकॉनात 19.2 ओव्हरींत 4 बाद 137 धांवड्यो करून जैत मेळयलें. परेश बांदेकारान 40 बॉलांत 6 सक्यांनी 35 धांवड्यो करून जैतांत म्हत्वाचें योगदान दिलें. ताची मॅन ऑफ दी मॅच म्हणून निवड केली. परेश मिक्सिन, पराय दुभाषी आनीओम फडते हांण दरेकी एक विकेट घेतली.
आयतारा जाल्ले दुसरे मॅचींत प्रायोरिटी टायटन्सान धेंपो चॅलेंजर्साचर 10 विकेटींनी हारयलें. मुक्तार काद्रीन 11 बॉलांत 3 आनी प्रज्योत रिवणकारान 2 विकेटी घेवन धेंपोचो डाव 72 धांवड्यांत सोपयलो. देविदास खोलकारान 38 बॉलांत 29 आनी दत्तेश प्रियोळकारान 16 बॉलांत 17 धांवड्यो करून धेपोचो डाव मात्सो साल्वार केलो. प्रायोरिटी पंगडान 10.2 ओव्हरींत 78 धांवड्यो करून सहज जैत मेळयलें. मुक्तार काद्रीन फकत 14 बॉलांत 35 धांवड्यो केल्यो आनी तो मॅन ऑफ दी मॅच थारलो.
मजगतीं, पणजी जिमखाना मेंबर्स लीग क्रिकेट सर्तीचें उक्तावण शेनवारा जमिखान्याच्या भाऊसाहेब बांदोडकार मैदानार जालें. ह्या वेळार भारतीय पंगडाचो आदलो फास्ट बॉलर आशिष नेहरा तशेंच पणजी जिमनखान्याचो अध्यक्ष मनोज कालुलो आनी सर्तींत वांटेकार जाल्ल्या स पंगडाचे धनी हाजीर आशिल्ले.
इफ्तिकार आगा ( प्रॅस्कॉन पँथर्स ), तन्मय खोलकार ( मानस मॅव्हरिक्स) , श्रीनिवास धेंपो (धेंपो चॅलेंजर्स), अश्विन चांदोईक ( बाले टायगर्स ), राजेश देसाय (आरसी गोवा), परिंद नाचनोलकार (प्रायोरिटी टायटन्स) हांच्या पंगडां मदीं ही लीग क्रिकेट सर्त जातली आनी शेनवारा आनी आयताराक मॅची जातल्यो.
सर्तींतल्या जैतिवंत पंगडाक 2 लाख उप जैतिवंत पंगडाक 1 लाख रोख इनाम दितले. 5 फेब्रुवारीक सर्तीची फायनल जातली. वट्ट 19 मॅचींची ही लीग सर्त आसा. शेनवारा जाल्ले सर्तीचे उक्तावणाचे मॅचींत प्रायोरिटी टायटन्सान मानस मॅव्हरिक्स आनी धेंपो चॅलेंजर्सान बाले टायगर्सांक हारयल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.