भांगरभूंय | प्रतिनिधी
भांगरभूंय । प्रतिनिधी
काणकोणः नवी दिल्लींतल्या पंतप्रधान कार्यालयांतले अधिकारी (पीएमओ) काणकोण तालुक्यांतल्या खोतीगांवांत दोन दिसाचें अभ्यास भोंवडेर आयल्यात. खोतीगांवांतल्या आदिवासी लोकांची जीण. तांच्यो गरजो आनी गांवांची भूगोलीक स्थिती हाचो अभ्यास करपा खातीर पीएओ कार्यालयांतले आयपीएस आनी आयएएस अधिकारी आयल्यात अशी म्हायती खोतीगांव पंचायतीचो सरपंच आनंदू देसाय हांणी दिली.
पीएमओ कार्यालयांतले अधिकारी खोतीगांवचो अभ्यास करपा खातीर येतले अशें दक्षीण गोंयचो जिल्होधिकारी आनी काणकोणच्या मामलेदारान खोतीगांव पंचायत मंडळाक पत्रां धाडून कळीत केल्लें. पंचायत मंडळाची भेट घेवन ह्या अधिकाऱ्यांनी आपले भोंवडेचो हेत सांगलो. ह्या अधिकाऱ्यांनी दोन दिसांत खोतीगांव पंचायत वाठारांतल्या बड्डें, आवळी वाठारांक भेट दिवन आदिवासी लोकां कडेन संवाद सादलो.
दुर्गम अशा नडकें, केरी आनी हेर वाठारांत वचून आदिवासी लोकांचे जिणे शैलीची, तांची संस्कृती, रिती रिवाज, धर्मीक परंपरा, सण हांची हे अधिकारी म्हायती घेतले अशें आनंदू देसाय हांणी सांगलें. अभ्यास भोंवडेर आयिल्ल्यां मदीं यशवंत शर्मा, अक्षय पिल्ले, गौतम सिंग, मेहर पनवाड, रवी कुमार आनी शामिया हांचो आसपाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
