भांगरभूंय | प्रतिनिधी
भांगरभूंय । प्रतिनिधी
म्हापशेंः पॉप्युलर फ्रंट ऑफ इंडिया (पीएफआय) ही संघटना बेकायदेशीर थारावन फुडली पांच वर्सा ही संघटना आनी तिच्या सलंग्न संस्थाचेर बंदी घालपाच्या केंद्र सरकाराच्या निर्णयाक हिंदु जनजागृती समितीच्या जय़ेश थळी हांणी येवकार दिला. फकत बंदी घालून चलची ना जाल्यार ह्या संघटनेची पाळांमुळां सरकारान खणून काडून देशांतल्या विघातक शक्तींचेर खर कारवाय करपाक जाय अशें तांणी मागलां.
पीएफआयचेर बंदी घालपाची मागणी आमी पयलीं सावन करीत आशिल्ले. हे संघटनेक 2047 मेरेन भारताक इस्लामीक देश करपाचें आसा. हाचे पुरावे गुप्तचर यंत्रणेक मेळ्ळ्यात. विदेशांतल्यान हे संघटनेक कोट्यांनी रुपयांचो निधी मेळटा. तांचें संबंद पाकिस्ताना कडेन लेगीत आसात. ते लव जिहादाक जल दितात. रोहिंग्या मुसलमानांक तेंको दिवपा खातीर रे रॅली काडटात. बांगलादेशी नागरिकांक भारतांत घुसखोरी करपाक हीच संघटना प्रवृत्त करता अशें थळी हांणी सांगलें.
रोहिंग्यांक धांवडावचें न्हय हे खातीर पीएफआयन धा वर्सा आदीं गोंयात काय ठिकाणी रॅली काडिल्ल्यो. देश विघातक काम करपी हे संघटने आड कारवाय करपा खातीर सरकाराक बऱ्याच उसरां जाग आयली अशें आदलो शिवसेना गोंय राज्य मुखेली रमेश नायक हांणी सांगलें. पीएफआयन देशांत जायते कडेन उपद्रव केल्यात. सरकारान फकत नांवा खातीर बंदी घालची न्हय जाल्यार ती मुळा सावन ना नपयत करची अशी मागणी हिंदु म्हासंघाच्या भाई पंडित हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
