भांगरभूंय | प्रतिनिधी
फुडले पांच दीस ऑरेंज अलर्ट
भांगरभूंय । प्रतिनिधी
पणजीः फुडले कांय दीस पावसाचो नेट कायम उरतलो. हवमाना खात्यान पांच दिसां खातीर ऑरेंज अलर्ट जारी करून आयज आनी फाल्यां उटंगाराचो पावसाची शिटकावणी दिल्या. ह्या म्हयन्यांत आतां मेरेन 5.52 इंच इतलो पावस पडला, अशी म्हायती हवामान खात्यान दिल्या.
हवामान खात्यान 13 ते 17 जून मेरेन ऑरेंज अलर्ट जारी करून उटंगाराच्या पावसाची शिटकावणी दिल्या. आयज आनी फाल्यां पावस बरोच नेट धरतलो उपरांत ताची तिव्रता उणी जातली. जोगलां नारून पावस पडटलो आनी पावसा वांगडा वराक 40 ते 50 किलोमिटर नेटाचो वारो मारतलो. वाऱ्याचो नेट वराक 60 किलोमिटर मेरेन पावपाक शकता, असो अदमास हवामान खात्यान उक्तायला.
फाटल्या 24 वरांत गोंयच्या सगळ्या वाठारांनी पावस झडलो. नेटाच्या पावसा वांगडा जोगलां लेगीत मारलीं. फाटल्या 24 वरांत गोंयांत 39.3 मिलीमिटर पावसाची नोंद जाल्या. उत्तर गोंयांत 20.5 मिलीमिटर आनी दक्षीण गोंयांत 56 मिलीमिटर पावसाची नोंद जाल्या. सगल्यांत चड 131 मिलीमिटर पावसाची नोंद काणकोणां नोंद जाल्या, सांगें 82.5 मिलीमिटर, मुरगांवां 57.4 मिलीमिटर, सांखळे 45.2 मिलीमिटर, केपें 45 मिलीमिटर, धारबांदोडें 43.2 मिलीमिटर, दाबोळे 41.2 मिलीमिटर, पोरणें गोंया 32.9 मिलीमिटर, फोंड्यां 26 मिलीमिटर, मडगांवां 21.3 मिलीमिटर, पणजे 19.2 मिलीमिटर, वाळपय 7 मिलीमिटर, म्हापश्यां 13.3 मिलीमिटर आनी पेडण्यां 5.4 मिलीमिटर पावसाची नोंद जाल्या.
1 ते 12 जून मेरेन 5.52 इंच पावस पडला. जाल्यार 1 मार्च ते 31 मे मजगतीं 26.24 इंच पावस पडला.
दक्षीण महाराष्ट्र – गोंय दर्यादेगेर 12 ते 16 जून मजगती वादळी वातावरण तयार जावन वराक 35 ते 45 किलोमिटर नेटान वारें घोळटलें आनी वाऱ्याचो नेट वराक 55 किलोमिटर मेरेन पावपाक शकता. ते खातीर नुस्तेकारांनी दर्यात वच्चें न्हय, अशी शिटकावणी हवामान खात्यान दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
