भांगरभूंय | प्रतिनिधी
मान्सूना आदलो पावस येतना जालो घोग्यांचो मान्सून. धा वर्सां आदले रिकॉर्ड तोडून आयिल्लो पावस 1 जूना उपरांत आपालिपा खेळपाक लागला. विसव गोंयांत, हेर राज्यांतल्या कांय जिल्ल्यांनी पावसाचो उटंगार आसा. सगल्यांत चड पावस पडपी एका तेंपावयलो आसामांतलो चेरापुंजी गांव मेघालय राज्यांत पावलो. आसामांतलो हुंवार दर वर्साचो अंदूं आडवेळा आयिल्ल्यान आकांताळें रूप दिसलें. पूर्वांचलांतलो सैम, शेतां, न्हंयो उदरगतींतय तिगून आसात. हुंवारांची शिटकावणी हवामान खात्यान दिली, कोणाक ती खरी दिसचीय ना. आसाम आमच्या देशाच्या इशान्येकडल्या राज्यांतलें सगल्यांत व्हड राज्य, लोकसंख्या आनी भूंयेनय. उदरगतीचे वाटेन वचपी आसामांत अंदूं आयिल्ल्या हुंवाराचें चित्र टीव्हीच्या खबरांतल्यान पळयतना हवामानशास्त्र चुकलें काय अशें दिशिल्लें. भारतीय वेधशाळेची वॅबसायट पळयल्यार आदीं येवपी पावसाची शिटकावणी मेळिल्ली. नाका आशिल्ल्या राजकारणांत ती व्हांवनय गेल्या आसतली. सगल्याच राज्य सरकारांनी हुंवारांत जावपी मनीसबळाचें लुकसाण उणें जातलें ताची जतनाय घेवपाची गरज आसा. संवसारांत जावपी हवामानशास्त्रांतले बदल भारताकय बादतात. धा वर्सां आदीं अंदूं सारको मान्सून बेगीन आयिल्लो, मात्सो विसव घेवन मान्सूनान आकांताळें रूप घेतल्यार कितें जातलें हाचो अदमास काडपाची गरज आसा. सगल्या राज्यांनी हुंवार वेवस्थापनाच्या वेगळ्या विभागाची बांदावळ जावची. हुंवार पावसाचो, हुंवार मनशाचो, हुंवार फळां फुलांचो, नुस्त्याचो येता तेन्ना तातूंतल्यान नवेंय किल्लता.
शेताची पिकावळ बदलपी हवामानशास्त्रा प्रमाण करप, किल्लता त्या अन्नाक बाजारा मेरेन पावोवपाच्यो सुविधा जावच्यो. बाजार ते घरा मेरेन अन्न, वस्त्र पावोवपा पासत मनीसबळ, येरादारी, कम्युनिकेशनाची तांक उंचेल्या पावंड्याची आसची.
हवामानशास्त्र, भूंयगर्भशास्त्र, पर्यावरण पर्यटनाच्या मळार नव्यो साधनसुविधा बांदतना अर्थकारणाक बळगें मेळटा. आमच्या जाण्टेल्यांनी पुरवण मागणेचें (सप्लाय, डिमांड) गणीत शिकयलें, तीच तर ज्येश्ठनीत.
पावस आपालिपा खेळटना भलायकी इबाडप, भाज्यांच्यो दरो वाडप हें वर्सावळीचें. अंदूं म्हारगाय आनीकय वाडल्या पुरवण कमी जाल्ल्यान. मान्सून आदीं आयिल्ल्यान पीकावळ भिजली, कुसली. मान्सूनाचे येवप तशेंच दीसभर न थांबता, न रावता, केन्ना केन्ना बेजार हाडपी, पुराय भिजोवपी. उपरांतच्या आपालिपांतल्यान थाकाय मेळ्ळी तरी दीस दीस भर पावसाचो थेंबो नासल्यार उश्णताय वाडटा खरसाण उबाळांतल्या ल्हारांइतली नासता. न्हंयो, दर्या, वझऱ्यांचे उदक परतून सळसळटा मान्सून परतून येता हो रकाद दिवपी. केन्ना हातांत, माथ्यार घेतल्यात पावसाचे थेंबे? पळल्यांत पावसाचीं बदलपी रंग आनी रुपां ?
आपालिपांतल्यान अचकीत पावसा वताचो खेळ, डराँव डराँव करपी बेबे, कवी मनोहरराय सरदेसाय हांचे कवितेंतले. बेब्याचें मांस खावप, रातयां गरोवणी करप सोंपून दिसा उजवाडा सुरू जालां व्हय? बेबे बांयतल्यान शेता म्हेरेर पावतात, तांचोय रंग बदलता, बदलपी हवामानशास्त्रांत बेब्यांक म्हत्व आसा. बेब्याचें डराँव डराँव करप बांयों पुरयल्ल्यान शारांनी उणें जालां आसत गांवांनी तें आयकूंक येता.
पावस येता, आयलो अशें भारतीय वेधशाळा सांगता, म्हायती दिता तितली उमेद पावसाच्या आपालिपाची खबर दिवपाक नासता. वेधशाळाय कुपांचो अभ्यास करता, कुपांतल्यान उत्तर, दक्षिणेक, पूर्व, पश्चिमेक आयिल्ले, येवपी पट्टे, भोंवरे दिसतले. शिटकावण्याचे रंग, रुप तातूंतल्यान लोकां मेरेन पावता.
अमास, पुनवेच्या शास्त्रांत वता, पावसाचीं गणीतां लिपिल्लीं आसतात. पुनव (11 जून) लागीं येता तेन्ना पावसाक नेट येतलो हें वेधशाळेन कळीत केलां. भरती, सुकती कशी येतली ती म्हायती दिल्या. ते म्हायतींतल्यान जाय तितलें गिन्यान घेवन लोकां मेरेन पावल्यार मनीसजीण वाटावतली. मालमत्तेक धरून बसल्यार दारामेरेन आयिल्लें हुंवाराचें उदक घर, मालमत्ता, मनीसजीणय बुडोवपी.
मळबांतली जोगलावणी पळयल्या, आयकल्या. वेधशाळा सांगता ती भुंयेरसावन मळबा मेरेन पावपी जोगलावणी गर्मेची आसतली. ल्हारां ल्हारांतल्यान जोगलां झगझगिल्लीं दिसतलीं. न्हंयच्या देगेवयले,फातरांतल्यो ल्हानशो कुल्ल्यो, तिसऱ्यो, खुबे, कोंगे बाजारांनी येतात, गायंडोळ तातूंत दिसतात?
कालचो पावस नितळ, भिजल्यार आंगार चिखोल उसळचोना, कोयराचो विलो नाशिल्ल्यान आयज पावस कोयरांतल्यान चिखलाचें उदक हाडटा अशीं किजिलां आसतलीं. चिखलांतल्यान फुडें वचपी, शॉपिंग करपी, शॉपी घडोवन हाडपीय आसतात. नळ्यांची सुवात पत्रे घेतले, ताडपत्र्योय मॉर्डन. सत्र्यो आनी रेनकोटाचे पावसावरी बदलपी रंग, रुपां मोबायलार दिसतात? दारांत आनी हातांत, आपालिपा तातूंतय आसता, तोय समजून घेयात, तीच ज्येश्ठनीत.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
