भांगरभूंय | प्रतिनिधी
खबरां संस्था
कोलंबोः आशिया कप सर्तींतल्या भारत- पाकिस्तान हाचे मदले फाटल्या आयतारा जाल्ले पयले मॅचीची जी गत पावसान केल्ली तीच गत काल आयतारा सुपर 4 मदले मॅचीची जाली. पयली मॅच पावसाक लागून रद्द करची पडली. पावसाक लागून आर प्रेमदासा स्टेडियमचें आवटफिल्ड ओलें जाल्ल्यान आयताराचो खेळ सोमाराक राखीव दिसा दनपारां 3 वरांचेर फुडें सुरू करतले. पावसाक लागून खेळ थांबोवचो पडलो तेन्ना भारतान आपल्या डावांत 24.1 ओव्हरींत 2 आवट 147 धांवड्यो केल्ल्यो.
पावसाक लागून खेळ तीन वरां बंद पडलो. अंपायरांनी तीन फावट मैदानाची पळोवणी केली. पयलीं साजें 7 वरांचेर उपरांत 7.30 वरांचेर आनी निमाणे 8 वरांचेर ताणी पळोवणी केली. स्टेडियमाचें आवटफिल्ड खेळ सुरू करपा सारकें ना हें पळोवन निमाणे मॅच सोमराक राखीव दिसा खेळोवपाचो निर्णय घेतलो. रातीं 9 वरांचेर खेळ सुरू करपा सारकी परिस्थिती आशिल्ली जाल्यार ही मॅच 34-34 ओव्हरींची करताशिल्ले. पावसाक परत सुरवात जातगीर खेळ थांबोवन सोमाराक सुरू करपाचें थारलें.
पाकिस्तानाचो कॅप्टन बाबर आझमान टॉस जिखून भारताक पयलीं खेळपाक सांगलें. खेळ पावसाक लागून थांबलो तेन्ना विराट कोहली 8 आनी केएल राहुल 17 धांवड्याचेर खेळटाले. रोहीत शर्मा आनी शुभमन गील ह्या ओपनरांनी भारताच्या डावाची सुरवात जाय तशी केली. ताणी दोगांनीय अर्द शेकडे करून 121 धांवड्यांची सलामी दिली. शाहीन आफ्रिदीच्या पयले ओव्हरीच्या निमाण्या बॉलार सको मारून रोहितान आपले खेळीची सुरवात केली. उपरांत 49 बॉलांत 4 सके आनी 6 चौक्यांनी ताणे 56 धांवड्यो केल्यो. शदाब खानाच्या बॉलिंगेचेर फहीम अशरफान ताका कॅच आवट केलो. पंगडाच्या 123 धांवड्याचेर शुभमन गिलाची शाहीन अफ्रिदीच्या बॉलार आगा सलमानान कॅच घेतली. गिलान 52 बॉलांत 10 चौक्यांनी 58 धांवड्यो केल्यो. वन-डेंतलो ताचो व्हो आठवो अर्द शेंकडो आशिल्लो. रोहितान वन-डे कारकिर्दींतलो 50वो अर्द शेंकडो मिडविकेटीचेर सको हुबोवन केलो. रोहीत- गिलान पयल्या पॉवरप्लेंत 50 धांवड्याची भागिदारी केली. ते उपरांत रोहितान शादाब खानाक 3 सके आनी एक चौको मारलो. रोहीत आनी गिलाची शेंकड्याची पांचवी भागिदारी केल्ली. नेपाळा आड तांणी 147 धांवड्यांची भागिदारी केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
